ბრიტანულმა კომპანია დავმა, რომელიც უამრავ ქვეყანაში ოპერირებს, ფეისბუკზე 3-წამიანი გიფი გამოაქვეყნა, რომელიც მსოფლიო მასშტაბით რასისტულად აღიქვეს.

ანიმაციის მიხედვით, შავკანიანი ქალი მუქი ფერის მაისურს იხდის და თეთრკანიან წითურ ქალად "გარდაიქმნება". ანიმაცია, რომელიც კომპანიამ ფეისბუკზე უკვე წაშალა, დავის ტანის დაბანის ლოსიონს არეკლამებდა.

უარყოფითი გამოხმაურებების შემდეგ, დავმა ტვიტერზე ბოდიში მოიხადა და თქვა, რომ ფეისბუკზე დაპოსტილი ფოტოთი სხვადასხვა კანის ფერის ქალების ინტერესები ვერ დაიცვა:

"ძალიან ვწუხვართ, რომ [ადამიანებს] შეურაცხყოფა მივაყენეთ".

თუმცა ეს პირველი შემთხვევა არაა, როცა დავი რასისტული იდეებით არეკლამებს თავის პროდუქციას.

ტვიტერის მომხმარებლები იმასაც ამბობენ, რომ დავი საპნების რასისტული რეკლამების ისტორიას აგრძელებს.

"მეგონა, რომ დავის რეკლამა ყალბი იყო, მანამ, სანამ არ ვნახე, რომ კომპანიამ ბოდიში მოიხადა. ნუთუ ადამიანები მართლაც დასხდნენ მაგიდის გარშემო და თქვეს, 'მოდით, გამოვაქვეყნოთ ეს ფოტო?'"