უკვე რამდენიმე წელია, გვანცა თალაკვაძე საქართველოს ბანკის გუნდს შემოუერთდა და IFRS ანგარიშგების სამსახურის უფროსის პოზიციას იკავებს. ფინანსურ სფეროში დაგროვებული მრავალწლიანი გამოცდილებისა და მაღალი პროფესიული სტანდარტების შესაბამისად, ის ფინანსური ინფორმაციის ანალიზს უზრუნველყოფს და ბანკს სტრატეგიული გადაწყვეტილებების მიღებაში ეხმარება. როგორც თავად აღნიშნავს, მთავარი მოტივაცია პროფესიონალ გუნდთან ერთად ხარისხიანი შედეგის მიღწევა და იმ გარემოში მუშაობაა, სადაც განვითარება ბუნებრივი პროცესია.

ინტერვიუში გვანცა გვიყვება კარიერული გზის, გამოცდილებისა და იმ პროფესიული ღირებულებების შესახებ, რომლებიც საქართველოს ბანკის ორგანიზაციული კულტურის განუყოფელი ნაწილია.

როდის შემოუერთდით საქართველოს ბანკის გუნდს და როგორი იყო onboarding-ის პროცესი?

საქართველოს ბანკს 2021 წელს შემოვუერთდი. Onboarding ჩემთვის მარტივი იყო — ბანკში ბევრ ადამიანს უკვე ვიცნობდი, რადგან 2014-2018 წლებში EY-ში ბანკის აუდიტორად ვმუშაობდი. ამიტომაც, თითქოს ახალ სამსახურში კი არა, ნაცნობ გარემოში დავბრუნდი. პირველივე დღიდან მქონდა შესაძლებლობა აქტიურად ჩავრთულიყავი მიმდინარე პროექტებში და უფრო ახლოს გამეცნო ბანკის პროცესები.

როგორი იყო თქვენი კარიერული განვითარების გზა?

ფინანსურ სფეროში კარიერა უნივერსიტეტის მეოთხე კურსზე დავიწყე, როცა EY LLC-ში აუდიტორულ გუნდს შევუერთდი. ეს გამოცდილება ძალიან მნიშვნელოვანი ეტაპი იყო. სწორედ იქ ვისწავლე დროის ეფექტურად მართვა, დეტალებისადმი ყურადღების მიქცევა და სისტემური აზროვნება. შემდეგი ეტაპი იყო m², სადაც უკვე მეორე მხრიდან დავინახე რეპორტინგის პროცესი: ანგარიშგების მომზადება, ფინანსური სტანდარტების შესაბამისად სხვადასხვა ტრანზაქციის აღრიცხვა და გადაწყვეტილებების მიღება. m2-ში IFRS რეპორტინგის მიმართულებას ვხელმძღვანელობდი, სამი წლის შემდეგ კი გადავწყვიტე, ახალი ნაბიჯი გადამედგა და საქართველოს ბანკს IFRS რეპორტინგის სამსახურის უფროსად შევუერთდი. ეს იყო ძალიან ბუნებრივი გაგრძელება — უფრო დიდი მასშტაბი, უფრო მაღალი სტანდარტები და გარემო, სადაც მუდმივად უნდა განვითარდე.

გვიამბეთ, თქვენი საქმიანობის შესახებ. რა არის ის მთავარი ღირებულება, რომელსაც თქვენი გუნდი ქმნის?

საქართველოს ბანკში ვხელმძღვანელობ IFRS რეპორტინგის გუნდს, სადაც ჩვენი მთავარი ყოველდღიური ამოცანაა, ზუსტი და სანდო ფინანსური ინფორმაციის მომზადება უზრუნველვყოთ. ჩვენი როლი მხოლოდ რიცხვების მომზადებით არ შემოიფარგლება — ჩვენ ვცდილობთ, თითოეული მაჩვენებლის არსი გავაანალიზოთ და დავინახოთ, როგორ აისახება ის ბანკის საქმიანობასა და სტრატეგიულ გადაწყვეტილებებზე. საკმაოდ საპასუხისმგებლო, მაგრამ ამავდროულად ძალიან საინტერესო საქმეა. ყველაზე დიდი მოტივაცია ის არის, რომ ჩვენი გუნდის მუშაობას რეალური გავლენა აქვს, ჩვენ ვეხმარებით მენეჯმენტს ფინანსურ ინფორმაციაზე დაყრდნობით მიიღოს სტრატეგიული გადაწყვეტილებები და განავითაროს ბიზნესი.

რაც შეეხება გამოწვევებს, მუდმივად ვცდილობ, სიახლეებს ავუწყო ფეხი — ახალ სტანდარტებსა თუ ტექნოლოგიურ მიდგომებს. ყველაზე დიდი გამოწვევა ალბათ დროა — ინფორმაციის დიდი მოცულობა და მკაცრი ვადები. ასეთ პირობებში, სიღრმისეული ანალიზი და სწორი დასკვნების გამოტანა ყველაზე დიდ პროფესიულ უნარად მიმაჩნია.

რომელ ძირითად 3 უნარს გამოყოფდით, რომელიც სწორედ საქართველოს ბანკში მუშაობისას შეიძინეთ?

საქართველოს ბანკში მუშაობამ ბევრი მნიშვნელოვანი უნარი ჩამომიყალიბა, თუმცა სამს განსაკუთრებით გამოვარჩევდი:

• ხარისხზე მაქსიმალური ორიენტირება — ბანკში საკმაოდ მაღალი სტანდარტები გვაქვს და ეს გვაძლევს შესაძლებლობას, მუდმივად გავაუმჯობესოთ საკუთარი შედეგი;
• განვითარება და სიახლეებთან სწრაფი ადაპტაცია — ბანკი მუდმივად იცვლება და ეს გარემო გიბიძგებს, სულ მზად იყო ახალი იდეებისთვის;
• ანალიტიკური აზროვნება დროის დეფიციტში — მოკლე დროში სწორი დასკვნების გამოტანა და გადაწყვეტილების მიღება.

ყველაზე ღირებული გაკვეთილი, რომელიც საქართველოს ბანკში მუშაობისას ვისწავლე, არის ის, რომ მიზნის მიღწევა ყოველთვის გუნდური ძალისხმევის შედეგია — როცა ირგვლივ პროფესიონალები გყავს, ყველაფერი ბევრად უფრო მარტივად და ხარისხიანად გამოდის.

და ბოლოს, რა გაძლევთ მოტივაციას, რომ არ გაჩერდეთ?

მიყვარს ის, რასაც ვაკეთებ — რეპორტინგი მხოლოდ ციფრები არ არის, ეს ყოველდღიური გამოწვევებით და ანალიზით სავსე პროცესია. ყველაზე დიდი მოტივაცია ჩემთვის სწორედ ეს არის. როცა ხედავ შენი გუნდის შრომის შედეგს და გრძნობ, რომ ამ ყველაფერს მნიშვნელობა აქვს, ეს ყველაზე დიდი სტიმულია.

ამასთან ერთად, მნიშვნელოვანი ფაქტორია ორგანიზაციული კულტურა —საქართველოს ბანკი ქმნის გარემოს, სადაც მუდმივი განვითარება ბუნებრივი პროცესია. დიდი ყურადღება ექცევა თანამშრომლების პროფესიულ ზრდას, ცოდნის გაზიარებას და ინიციატივების წახალისებას. ასეთი მიდგომა ქმნის სამუშაო გარემოს, სადაც გუნდი თავს მოტივირებულად და დაფასებულად გრძნობს — ეს კი საბოლოოდ აისახება შედეგის ხარისხსა და საერთო წარმატებაზე.