საქართველოში ლიდერმა საინვესტიციო ბანკმა, გალტ & თაგარტმა კიდევ ერთი საერთაშორისო აღიარება მოიპოვა: ფინანსურმა გამოცემა Euromoney-მ მას ქვეყანაში 2025 წლის საუკეთესო საინვესტიციო ბანკის ჯილდო გადასცა.

აღნიშნული ტიტული გალტ & თაგარტმა Euromoney’s Awards for Excellence-ის დაჯილდოების ფარგლებში მიიღო. იგი გლობალური საბანკო ინდუსტრიის ერთ-ერთ ყველაზე პრესტიჟულ დაჯილდოებად ითვლება.

გალტ & თაგარტისთვის აღნიშნული ჯილდოს მინიჭება დაეფუძნა საერთაშორისო სტანდარტებით შესრულებულ შეფასებებს, სადაც განხილული იყო ბანკის ბაზრის წილი, განხორციელებული გარიგებების მასშტაბი და სიხშირე, ინოვაციური პროდუქტები, მომხმარებლებზე მორგებული სერვისები, აგრეთვე, რეპუტაცია ადგილობრივ თუ საერთაშორისო ბაზარზე.

“ეს ჯილდო ძლიერი გუნდის, მომხმარებელთა ნდობისა დაბოლო ერთი წლის განმავლობაში მუდმივი განვითარების შედეგია, განსაკუთრებით ვამაყობთ იმ პროექტებით, რომლებიც ადგილობრივი კაპიტალის ბაზრის განვითარებას ემსახურება, მათ შორისაა, პროგრამა CMS, რომელსაც ამჯერად, საქართველოს შემდეგ, სომხეთში ვახორციელებთ. აგრეთვე, მნიშვნელოვან ინოვაციებს ვნერგავთ საცალო მიმართულებით, მაგ., GT Trader-ის განახლებული პლატფორმა მომხმარებლებს უფრო მეტ საფონდო ბირჟაზე უხსნის წვდომას. ჩვენ ვამაყობთ, რომ ბაზრის მონაწილეებს ინფორმირებული გადაწყვეტილებების მიღებაშიც ვეხმარებით, ამისთვის მუდმივად ვაძლიერებთ კვლევით მიმართულებას, ბიზნესსა თუ ფართო საზოგადოებას მაღალი ხარისხის სექტორული ანგარიშების გასაზიარებლად. რაც მთავარია, მადლობას ვუხდი ჩვენს გუნდს, რადგან აღნიშნული ჯილდო მათი ძალისხმევის შედეგია“, — აცხადებს გიორგი კუპრაშვილი, გალტ & თაგარტის გენერალური დირექტორი.

ინფორმაციისთვის, უკვე 30 წელზე მეტია, რაც Euromoney გამოარჩევს იმ ფინანსურ ინსტიტუტებს, რომლებმაც ინოვაციური მიდგომებით ფინანსურ ინდუსტრიაში საკუთარი ადგილის დამკვიდრება შეძლეს. დღეს ჯილდო Euromoney’s Awards for Excellence სექტორისთვის გლობალურად აღიარებული სტანდარტი და საორიენტაციო ნიშნულია.