პოტერჰედებისთვის დიდი ამბავი გვაქვს! ჰარი პოტერის სერიალში მონაწილე პირველი მსახიობების ვინაობა გახდა ცნობილი. ბოლო თვეების განმავლობაში შეუწყვეტელი მითქმა-მოთქმის შემდეგ, HBO-მ დაადასტურა, ვინ განასახიერებს ჰოგვორტსის პროფესორებსა და სხვა თანამშრომლებს.

  • ჯონ ლითგოუ ჰოგვორტსის დირექტორის, ალბუს დამბლდორის, როლში
  • ჯენეტ მაკტირი პროფესორ მინერვა მაკგონაგელის როლში
  • პააპა ესიდუ პროფესორ სევერუს სნეიპის როლში
  • ნიკ ფროსტი ჰოგვორტსის გასაღებებისა და მიწების მცველის, რუბეუს ჰაგრიდის, როლში
  • ლუკ თელონი პროფესორ ქვირინუს ქვირელის როლში
  • პოლ უაითჰაუსი ჰოგვორტსის ყარაულის, არგუს ფილჩის, როლში

"მოხარულები ვართ, რომ ასეთი არაჩვეულებრივი ნიჭის მქონე მსახიობები შემოვიკრიბეთ და ერთი სული გვაქვს, ვნახოთ, როგორ გააცოცხლებენ ჩვენთვის საყვარელ პერსონაჟებს", — აცხადებს სერიალის აღმასრულებელი პროდიუსერი ფრანჩესკა გარდინერი.

აღსანიშნავია, რომ დიდი მოლოდინის მიუხედავად, ფანების ნაწილი მსახიობების ვინაობის გაგებისას აღფრთოვანებული არ დარჩენილა. მეტიც, ჯერ კიდევ მაშინ, სანამ ინფორმაცია ოფიციალურად დადასტურდებოდა, სნეიპის როლზე შავკანიანი მსახიობის განხილვამ არაერთგვაროვანი გამოხმაურება გამოიწვია.

ჰარი პოტერის სერიალის გადაღებები, სავარაუდოდ, ამ ზაფხულს დაიწყება. მანამდე კი ჩვენ ასევე გავიგებთ, ვინ განასახიერებს ლეგენდარულ ტრიოს: ჰარის, რონსა და ჰერმიონს. მთავარი როლის შემსრულებელი მსახიობებისთვის ღია ქასთინგი შარშან შემოდგომაზე დაიწყო და მასში მონაწილეობა 30 ათასზე მეტმა ბავშვმა მიიღო.

ფოტო: Warner Bros.

წლების განმავლობაში გავრცელებული ხმები, ჰარი პოტერის სერიალზე მუშაობის შესახებ, საბოლოოდ 2023 წელს დადასტურდა. მაშინ გავიგეთ ისიც, რომ სერიალი მთელ ათწლეულს გასტანს, თითოეულ წიგნს კი თითო სეზონი დაეთმობა.

ჯოან როულინგის ჰარი პოტერი ყველა დროის ერთ-ერთი ყველაზე პოპულარული წიგნების სერიაა. ის თარგმნილია 87 ენაზე და მსოფლიოში 600 მილიონზე მეტ ეგზემპლარად არის გაყიდული. შვიდწიგნეულის მიხედვით გადაღებული რვავე ფილმის შემოსავალმა კი ჯამში $7,7 მილიარდს გადააჭარბა.

ნახეთ ჩვენი ყველა მასალა ჰარი პოტერზე.