ცნობილმა ქართველმა მუსიკოსმა ნინა სუბლატმა პირველი ქართულენოვანი კომპოზიცია გამოუშვა. სიმღერა, სახელწოდებით ცარიელი, ამავდროულად პირველი სინგლია ალბომიდან, რომელიც მსმენელს მალე შეხვდება.

"წლები ელოდებოდა ეს სიმღერა გაზიარებას და სხვის გონებასა და გულში შესვლას", — წერს სუბლატი, — "რა თქმა უნდა, უზომოდ გამიხარდება თუ ცარიელი თქვენამდე მოაღწევს და თავის ადგილს დაიკავებს, ამიტომ გამიზიარეთ შეგრძნებები".

სიმღერის ავტორები ნინა სუბლატი და გიორგი შამანაური არიან. ალბომს კი, რომელშიც ეს სინგლი შედის და რომელსაც სულ მალე მოვისმენთ, HECTA ჰქვია.

ნინა სუბლატი ქართველმა მსმენელმა 2013 წელს გაიცნო, როცა სატელევიზიო მუსიკალურ კონკურსში, საქართველოს ვარსკვლავში, გამოჩნდა. 18 წლის ნინა მეგაშოუს გამარჯვებული გახდა, ერთი წლის თავზე კი სადებიუტო ალბომიც გამოუშვა.

2015 წელს სუბლატმა თავისი დაწერილი სიმღერით, Warrior, საქართველო ევროვიზიის სიმღერის კონკურსზე წარადგინა ვენაში. ევროფესტივალზე ნინამ მე-11 ადგილი დაიკავა, მისი საკონკურსო სიმღერა კი არაერთი ქვეყნის ჩარტებში აღმოჩნდა.

ცარიელის გარდა, ნინა სუბლატის ერთ-ერთი ბოლო ნამუშევარი სერიალ უხილავი თამაშისთვის შექმნილი მუსიკაა, რომელზეც მან ასევე გიორგი შამანაურთან ერთად იმუშავა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...