იეზიდი ბიჭი, რომელიც ტერორისტულ დაჯგუფების მიერ კონტროლირებულ ტერიტორიიდან გადაარჩინეს, 3 წლის შემდეგ, კანადაში თავის ოჯახს დაუბრუნდა.

ემად მიშკო ტამო მხოლოდ 9 წლის იყო, როდესაც ჩრდილოეთ ერაყში მისი ოჯახი ტყვედ ჩავარდა. ოჯახის წევრები ერთმანეთს დააშორეს. ემადის დედამ, ნოფა ზაღლამ, ტერორისტებისგან თავის დაღწევა შეძლო და თავის 4 შვილთან ერთად სპეციალური სამთავრობო პროგრამით კანადაში მოხვდა.

ემადის ოჯახი.

ფოტო: Lyza Sale / CBC

პროგრამა იმ იეზიდებს, რომლებიც ISIS-ს თავს აღწევენ, კანადაში თავშესაფარს სთავაზობს.

ნოფა ფიქრობდა, რომ მისი შვილი მკვდარი იყო, ვიდრე ინტერნეტში მისი ფოტო არ ნახა. ემადი ერაყის ჯარმა ივლისში გადაარჩინა, სწორედ მაშინ გავირუსდა მისი სურათიც, რომელმაც ოჯახს იმედი დაუბრუნა.

ფოტოებმა მონრეალელი ბიზნესმენის, სტივ მამანის, ყურადღება მიიპყრო, რომელიც გადარჩენილ იეზიდელებს კანადაში ჩასვლაში ეხმარება. მას "ებრაელ შინდლერს" უწოდებენ.

მამანის თქმით, მას ფეისბუკზე ხშირად თაგავენ იეზიდების ფოტოებზე, მაგრამ როდესაც ემადის ფოტოზე მონიშნეს, მიხვდა, რომ მას სასწრაფოდ უნდა დახმარებოდა.

ფოტო: Steve Maman

ფოტო: Steve Maman

ამის შემდეგ, ბიზნესმენმა ემადზე ინფორმაციის მოძიება დაიწყო და ის ნათესავებმა ამოიცნეს. გაირკვა, რომ ბიჭის ოჯახის წევრები ცოცხლები იყვნენ.

მამანმა კანადის მთავრობას წერილები მისწერა, მათ შორის ჯასტინ ტრუდოსაც.

ემადის ისტორიამ ხელისუფლების ყურადღება მიიპყრო. იმიგრაციის მინისტრმა აჰმედ ჰუსენმა 12 წლის ბიჭის საქმე პირად კონტროლზე აიყვანა.

ფოტო: Ari Jalal / Reuters

იმიგრაციის სამინისტროს წარმომადგენლები იმ ქალაქში ჩავიდნენ, სადაც ემადი აისისის ტერიტორიიდან გამოყვანის შემდეგ იმყოფებოდა და 3 წლიანი განშორების შემდეგ, ის ოჯახთან ჩაიყვანეს.

ემადი ოჯახის წევრებს ხუთშაბათს, 10 აგვისტოს დაუბრუნდა.

ამ დროისთვის ბიჭი ოჯახის წევრებთან იმყოფება. შეხვედრა ემოციური იყო, ერთდროულად სევდით და სიხარულით სავსე. იეზიდების ასოციაციის პრეზიდენტის თქმით, ამ დროისთვის ემადის მამა და მისი ერთი ძმა ჯერ ისევ დაკარგულად ითვლებიან.

ემადის დედა მისი შვილის ბანერთან.

ფოტო: Steve Maman