სულ ახლახან ესპანურ ტელეარხზე დოკუმენტური ფილმი სახელწოდებით, კოლუმბის დნმ: ნამდვილი წარმომავლობა, გამოვიდა. ფილმში ქრისტეფორე კოლუმბის საფლავის შესწავლა და კვლევის შედეგებია ნაჩვენები. მეცნიერები კოლუმბის წარმომავლობას 2003 წლის შემდეგ იკვლევენ. ახალმა კვლევებმა კი დაადგინა, რომ მოგზაური სეფარდი ებრაელი იყო.

ტერმინი "სეფარდი ებრაელი" მომდინარეობს "სეფარადიდან", ებრაული სიტყვიდან, რომელიც აღნიშნავს იბერიის ნახევარკუნძულს, რომელიც თანამედროვე ესპანეთსა და პორტუგალიას მოიცავს.

კოლუმბი 1451 წელს იტალიაში, გენუაში, დაიბადა. წლების განმავლობაში მეცნიერები ვარაუდობდნენ, რომ კოლუმბი შესაძლოა წარმოშობით ბერძენი, ბასკი, პორტუგალიელი ან ბრიტანელი ყოფილიყო. გამომდინარე იქიდან, რომ ადრე მსგავსი კვლევების ჩატარება შეუძლებელი იყო, მეცნიერებმა 25 შესაძლო ადგილიდან ყველაზე სარწმუნოდ სწორედ ხმელთაშუა ზღვის მიმდებარე ქვეყნები მიიჩნიეს.

ფოტო: BBC

ახალი კვლევების ხელმძღვანელმა, გრანადის უნივერსიტეტის სასამართლო მედიცინის პროფესორმა ­— ხოსე ანტონიო ლორენტემ, განაცხადა, რომ მათ კოლუმბის გარდა მისი შვილის დნმ-იც, ჰქონდათ შესასწავლად.

"დნმ აჩვენებს, რომ კოლუმბი ხმელთაშუა ზღვის დასავლეთიდან იყო. თუ მე-15 საუკუნეში გენუაში ებრაელები არ იყვნენ, ალბათობა იმისა, რომ კოლუმბი წარმოშობით იქიდან იყო, მინიმალურია. არც იტალიის დანარჩენ ნახევარკუნძულზე იყვნენ დიდად ებრაელები, რაც საქმეს ძალიან ართულებს." — ხოსე ანტონიო ლორენტე

დაახლოებით 300 000 ებრაელი ცხოვრობდა ესპანეთში ისაბელ I კასტილიელის ეპოქამდე, კათოლიკე მონარქებმა მეფე ფერდინანდმა და დედოფალმა ისაბელ კასტილიელმა ებრაელებსა და მუსლიმებს უბრძანეს რელიგიის შეცვლა, წინააღმდეგ შემთხვევაში მათ გადასახლება ემუქრებოდათ. ესპანეთიდან ებრაელები 1492 წელს განდევნეს, იმავე წელს, როდესაც კოლუმბმა პირველად იმოგზაურა ამერიკაში.

ახალი აღმოჩენის შემდეგ მეცნიერები ვარაუდობენ, რომ კოლუმბმა რელიგია შეიცვალა ან თავის ებრაულ იდენტობას მალავდა.