ნეტფლიქსმა ძმები რუსოების ახალი ფილმის ფოტოები გამოაქვეყნა. ფილმის სახელია The Electric State და იმავე სახელწოდების ნოველის მიხედვითაა გადაღებული. მოვლენები 1990-იანი წლების ალტერნატიულ, რეტრო-ფუტურისტულ რეალობაში ვითარდება. ფილმის სამყაროში რობოტები ადამიანებს აუჯანყდნენ და დამარცხდნენ. მარცხის შემდეგ ისინი გადასახლებაში ცხოვრობენ.

ფილმში Stranger Things-ის ვარსკვლავი, მილი ბობი ბრაუნი, მიშელის როლს ასრულებს. მიშელი ობოლი გოგოა, რომელიც დაკარგულ ძმას ეძებს. მას რობოტი, სახელად კოსმო, ეხმარება. კოსმოს მიშელის დაკარგული ძმა აკონტროლებს და მასთან მისასვლელ გზას ასწავლის. ჯგუფს, მალევე, კიტსი უერთდება. კიტსის როლის შემსრულებელი გალაქტიკის მცველების მსახიობი კრის პრატია. მისი პერსონაჟი ომის ვეტერანია, რომელსაც სატვირთო მანქანა ჰყავს და კონტრაბანდულ სქემაშია ჩართული. ის მიშელს ძმის მოძებნაში და გატაცების მიზეზის გარკვევაში ეხმარება.

ფოტო: netflix

Vanity Fair-თან საუბრისას ანტონი რუსომ განაცხადა, რომ ფილმი მარველის სამყაროში დასაბრუნებელი ხიდი იქნება.

როგორც იცით, გასულ ზაფხულს რუსოებმა გულშემატკივრები მარველში დაბრუნებით გაახარეს. ისინი მარველის ახალი ფილმების, შურისმაძიებლები: განკითხვის დღე და შურისმაძიებლები: საიდუმლო ომები, რეჟისორები იქნებიან. დაანონსებული ფილმები მულტივერსის საგის დასასრულია.