ნეშვილის პოლიციის ცნობით, ჯონ ბონ ჯოვიმ ქალი, რომელიც ხიდიდან გადახტომას აპირებდა, გადაარწმუნა და მისი სიცოცხლე იხსნა.

ინციდენტი სამშაბათს საღამოს, ჯონ საიგენტჰალერის საფეხმავლო ხიდზე მოხდა და სათვალთვალო კამერეშიც დაფიქსირდა. როკ-ენდ-როლის ლეგენდა შორიახლოს მუსიკალურ ვიდეოს იღებდა, თუმცა ხიდი მოქალაქეებისთვის გადაკეტილი არ ყოფილა.

ნეშვილის მეტროპოლიტენის პოლიციის განყოფილებამ ვიდეო ოთხშაბათს გაავრცელა. ვიდეოში ჩანს, რომ ქალი ქამბერლენდის მდინარეში ჩახტომას აპირებდა და ხიდის კიდეზე იყო გადახრილი.

კადრი სათვალთვალო კამერიდან, სადაც ჩანს, როგორ ეხმარება ბონ ჯოვი ქალს

ფოტო: Nashville Police Department

ბონ ჯოვი და კიდევ ერთი პირი ქალს ფრთხილად მიუახლოვდნენ და მას საუბარი დაუწყეს, რის შემდეგაც ქალი შემოტრიალდა და მათ შეხედა. დაახლოებით ერთი წუთის შემდეგ, ბონ ჯოვი ქალს ხიდის მოაჯირზე გადმოსვლაში დაეხმარა, ჩაეხუტა და მასთან ერთად გააგრძელა სიარული.

პოლიციის წარმომადგენლის ცნობით, ქალის შესახებ ინფორმაცია მენტალური ჯანმრთელობის დამცველ ორგანიზაციას მიეწოდა, რომელიც მის მდგომარეობას ზედამხედველობას გაუწევს.

ჯონ ბონ ჯოვის კრიზისში მყოფ ადამიანებთან სწორი კომუნიკაციის დიდი გამოცდილება აქვს, რადგან მისი ფონდი, JBJ Soul Foundation უსახლკარო ადამიანებს ეხმარება.