გლობალური მულტიმედია სააგენტო Great Big Story ქართულ ცეკვებსა და სუხიშვილებზე მოკლე, მაგრამ ინფორმატიულ და საინტერესო სიუჟეტს აქვეყნებს:

"როდესაც სცენაზე ვცეკვავ, უბედნიერესი ვარ და სამყარო ჩემი მგონია. ამ დროს მჯერა, რომ ფრენაც შემიძლია", ამბობს სუხიშვილების ანსამბლის მოცეკვავე დავით ჭანიშვილი.

ამ დროს მაყურებელი ჰაერში მსუბუქად მოლივლივე მოცეკვავეს ხედავს, რომელიც თითქოს სივრცეს გემით მიაპობს.

დავით ჭანიშვილი სუხიშვილების ანსამბლის მოცეკვავეა. მისი თქმით, სხეულზე უამრავი ტრავმა აქვს მიღებული, თუმცა ახლა უკვე იდეალურ ფორმაშია:

"ანსამბლის წევრები დილით ვვარჯიშობთ, შემდეგ ვცურავთ, ამის შემდეგ კი დავრბივართ. ჩვენ სპორტსმენებივით ვართ".

ილიკო სუხიშვილისა და ნინო რამიშვილის სახელობის ქართული ნაციონალური ბალეტის სახელმწიფო აკადემიური დასი უკვე 70 წელზე მეტია არსებობს.

მოცეკვავეებს ქართული ტრადიციული ცეკვის შესრულებისას წარმოუდგენელი მოძრაობების შესრულება უწევთ. ამ ხელოვნებისთვის ისინი განუწყვეტლივ შრომობენ და სცენაზე მთელი თავისი დიდებულებით წარმოაჩენენ განსაცვიფრებელ უნარებსა და ურთულეს ათლეტურ მოძრაობებს.

სუხიშვილების ანსამბლი, ნინო სუხიშვილის ხელმძღვანელობით, 100-ზე მეტ ქართველ მოცეკვავეს აერთიანებს. ცოცხალი მუსიკის თანხლებით, ისინი მსოფლიოს აცნობენ ქართული ხალხური ცეკვის, კლასიკური ბალეტისა და თანამედროვე ცეკვების ნაზავს.