ხუთშაბათის შეხვედრები — ასე ჰქვია პანელური დისკუსიების სერიას, რომელსაც თიბისი ბიზნესი მცირე და საშუალო ბიზნესების მხარდასაჭერად თვეში ერთხელ, ხუთშაბათობით მართავს.

პროექტი უკვე რამდენიმე თვეა marketer.ge-სთან და visa-სთან კოლაბორაციით ხორციელდება.

შეხვედრების მთავარი მიზანი მცირე და საშუალო ბიზნესის განვითარების ხელშეწყობაა. მრგვალი მაგიდის ირგვლივ მოწვეული სტუმრები აუდიტორიას გულწრფელად უზიარებენ თავიანთ მიდგომებს ბიზნესის მართვის ისეთ საკითხებზე, როგორიცაა, ბრენდის განვითარება, მარკეტინგი, კომპანიის მართვის სტილი და ა.შ.

ხუთშაბათის შეხვედრების სერია გასული წლის ოქტომბერში დაიწყო, ხოლო ბოლო, რიგით მეშვიდე შეხვედრა სულ ახლახანს, 11 ივლისს ჩატარდა.

მრგვალი მაგიდის ირგვლივ დისკუსია ამჯერად კრიზისების მართვის სპეციალისტებმა გამართეს. დისკუსია შეეხებოდა ყველა ბიზნესისთვის ისეთ მნიშვნელოვან თემას, როგორიცაა კრიზისის მენეჯმენტი — უფრო კონკრეტულად კი, რა სტრატეგიებს ირჩევენ კომპანიები კრიზისის გადასაჭრელად, რეალურ მაგალითებზე დაყრდნობით რა გამოცდილება დაგროვდა ამ მიმართულებით ქართულ ბიზნესში.

დიზაინ ინსტიტუტის დამფუძნებელი, ნინო ეგაძე აღნიშნავს, რომ კრიზისის მართვის მიმართულებით მსგავსი ტიპის შეხვედრების არსებობა მცირე და საშუალო ბიზნესებისთვის ძალიან მნიშვნელოვანია, რადგან კომპანიებს ხშირად არ აქვთ რისკების დაზღვევის რესურსი და მზაობა. შესაბამისად, კრიზისის მენეჯმენტში სხვისი გამოცდილების გაზიარება ბრენდის მხრიდან ნაკლებ შეცდომას ნიშნავს.

ჯეპრას უფროსი კონსულტანტი, კახა მაღრაძე აღნიშნავს, რომ მისთვის განსაკუთრებით კომფორტული და საინტერესო ხუთშაბათის შეხვედრების ფორმატია, რომელიც ჯანსაღი დისკუსიის საშუალებას იძლევა.

“აქ ბევრი ვისაუბრეთ ღირებულებებზე, საზოგადოების განვითარებაზე და ა.შ, თუმცა, მთავარი პრობლემა კამათის და დისკუსიის ნაკლებობა მგონია. შესაბამისად, მნიშვნელოვანია ისეთი სივრცის არსებობა, სადაც ნაკლებად დავუპირისპირდებით ერთმანეთს. რაც უფრო ბევრს ვიფიქრებთ, ვიკამათებთ, განვითარების მით მეტი შესაძლებლობა გაჩნდება. ხუთშაბათის შეხვედრების ფორმატი კი ამის საშუალებას იძლევა.“

როგორც ინტეგრირებული კომუნიკაციების ექსპერტი, თინათინ სტამბოლიშვილი გვიზიარებს, მისთვის ხუთშაბათის შეხვედრები ახალი გამოცდილება და ძალიან კარგი საშუალებაა იმ აუდიტორიის გასაცნობად, რომელთანაც საერთო მიზნები და ღირებულებები აკავშირებს.

ღონისძიებების სერიის რიგით მეშვიდე შეხვედრაზე სპიკერები იყვნენ:

• ნინო ეგაძე — დიზაინ ინსტიტუტის დამფუძნებელი
• კახა მაღრაძე — ჯეპრას უფროსი კონსულტანტი
• თინათინ სტამბოლიშვილი — ინტეგრირებული კომუნიკაციების ექსპერტი

თიბისი ბიზნესის ხუთშაბათის შეხვედრები მრგვალი მაგიდის ირგვლივ მომდევნო თვეში დაბრუნდება და მსმენელს კიდევ უფრო მეტ, საინტერესო თემას და სიახლეს შესთავაზებს.