1991 წლის 30 ივლისს, მაშინ როდესაც დიდი ალბათობით, ყველას ზაფხულის სიცხე გვტანჯავდა, დიდ ბრიტანეთში, ერთ-ერთ პირქუშ და ღვთისაგან მივიწყებულ კუნძულზე, ჰარი ვერ იძინებდა, რადგან სიცივე ძვალსა და რბილში უვლიდა. კანკალებდა, აქეთ-იქით ბრუნავდა, ტრიალებდა, თან ცარიელი მუცელი უბუყბუყებდა.

შუაღამისას ისეთი ჭექა-ქუხილი ატყდა, დადლის ხვრინვაც კი გადაფარა. დივანზე გადმოკიდებულ მსუქან დადლის მაჯაზე საათი ეკეთა. ციფერბლატი ანათებდა და ჰარის ატყობინებდა, რომ ათ წუთში თერთმეტი წელი შეუსრულდებოდა. წიკწიკით ახლოვდებოდა დაბადების დღე. "ნეტავ ამათ თუ ახსოვთ, ფიქრობდა ჰარი, ან ის უცნობი სად არის ახლა, მე რომ წერილებს მწერდა."

ფოტო: Giphy

ჯოან როულინგის რომანის მთავარი გმირი, ჰარი პოტერი, თავის მეთერთმეტე დაბადების დღეს სწორედ ასე შეხვდა. დღეს, როდესაც პირველად შეიტყო, რომ ჯადოქარია.

ფოტო: Duel_Final_Harry-Voldemort

ჯადოსნურ და რეალურ სამყაროში მას უმრავი გულშემატკივარი და მტერი გამოუჩნდა. საბოლოოდ კი მათ შორის ყველაზე ბოროტი, ბნელი ძალების ლორდი დაამარცხა კიდეც.

ფოტო: კადრი ფილმიდან

დიახ, დღეს 31 ივლისია და ჰარი პოტერი ოცდამეჩვიდმეტედ აღნიშნავს საკუთარ დაბადების დღეს, ამჯერად მეუღლესთან, ჯინ უიზლისთან და საყვარელ შვილებთან ჯეიმს სირიუს, ლილი ლუნა და ალბუს სევერუს პოტერებთან ერთად.

ჩვენ კი იმედი გვაქვს, რომ ჰარის შუა ხნის კრიზისი არ დაეწყება და წითელ ნიმბუს 2017-ში არ მიათხლიშავს ბავშვების ჰოგვორტსში განათლების ფულს.