ქართველმა მუსიკოსმა, დათო ჯიქიამ, სასცენო სახელით Qaji Todia, 9 აპრილს სადებიუტო ალბომი გამოუშვა. პოპულარული ქართული ინდი-როკ ჯგუფის, Bedford Falls-ის, წამყვანი ვოკალისტის პირველ სოლო ნამუშევარს FULLMETAL GEORGIA ჰქვია და 12 სიმღერას აერთიანებს. ალბომში შემავალ ამავე სახელწოდების სიმღერაზე კი მუსიკოსმა ვიდეოკლიპიც გადაიღო, რომლის პრემიერა 14 აპრილს შედგა. კლიპის რეჟისორი ერე ხელაშვილია.

როგორც ალბომში შემავალი ყველა სიმღერა, FULLMETAL GEORGIA-ც ჯიქიას დაწერილია. კომპოზიციის ტექსტში კი საინტერესო სიმბოლოებს შეხვდებით. ერთ-ერთი სიმბოლო — "წმინდა გიორგის ხატი, ხელებში ავტომატით" — ალბომის გარეკანზეცაა გამოტანილი.

სადებიუტო ალბომის გამოშვება დათო ჯიქიამ იანვარში დააანონსა. მუსიკოსის თქმით, სიმღერები ერთგვარად დამოუკიდებელი საქართველოს ისტორიას ჰყვება, რადგან 1989 წლიდან 2000-იანებამდე პერიოდს შეეხება.

პარლამენტის თაღებიდან მდუღარე რძე გადმოვიდა,
წვიმაში დგომის ფასია მოუსვენარი ვნება,
რომ ყველამ ერთად ავიხდინოთ ხუთჯვრიანი ოცნება.

Qaji Todia, FULLMETAL GEORGIA

"ალბომში თავმოყრილია ეროვნული მოტივები, ბევრად უცნაური ბგერები და უბრალო ექსპერიმენტული მელოდიები, რადგანაც მუსიკა მიყვარს და ის საკმარისი არასოდესაა", — აღნიშნავს ჯიქია.

ფოტო: qajitodia / Instagram

ჯგუფი Bedford Falls 2014 წელს ჩამოყალიბდა და მისი ერთ-ერთი დამფუძნებელი სწორედ ჯიქიაა. ბენდის სადებიუტო ალბომმა This Is Your House დღის სინათლე 2019 წელს იხილა. 2022 წელს ჯგუფმა რჩეულ კომპოზიციებს კიდევ ერთ ალბომში მოუყარა თავი, 2023 წელს კი გამოვიდა ალბომი miende. სხვადასხვა წელს Bedford Falls გამოჩნდა Tbilisi Open Air-ის სცენაზე. შარშან მათ ევროპული ტურნეც მოაწყვეს.

Bedford Falls-ის დამფუძნებელ და ამიერიდან უკვე პროექტ QAJITODIA-ის შემქმნელ დათო ჯიქიას კი ასევე აქვს ჩაწერილი კოლაბორაციები სხვა ქართულ ჯგუფებთან: Killages-თან, 4D Monster Lobsters-თან და Circus Mircus-თან. ამასთან, პროექტის "მრავალი ხმა — ერთი სამშობლო" ფარგლებში მომღერალმა ჩაწერა დუეტი ნატო მეტონიძესთანაც.

აღსანიშნავია ისიც, რომ ჯიქიას შემოქმედება მხოლოდ მუსიკას არ მოიცავს; 2019 წელს მან სადებიუტო რომანი კაკაფონია გამოსცა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...