პრინცესას დღიურების ნახვის შემდეგ თუ შენც გიოცნებია, ერთ დღესაც აღმოგეჩინა, რომ სამეფო ოჯახის წარმომადგენელი იყავი, მარტო არ ხარ. ეგ ოცნება ამჯერად უმჯობესია დაურეკოთ სოლის მსახიობ ბობ ოდენკირკს "აუხდა". ოდენკირკმა გადაცემაში Finding Your Roots გაიგო, რომ მეფე ჩარლზ III-ის მე-11 თაობის ბიძაშვილი ყოფილა. მთლად პრინცესობას არ უტოლდება, მაგრამ რა უჭირს.

გადაცემაში, რომელშიც ცნობილი ადამიანების გენეალოგიას იკვლევენ, აღმოჩნდა, რომ წარმოშობით ჩიკაგოელ მსახიობს დიდ ბრიტანეთში წინაპრები ჰყავდა.

"თავს ისე ვგრძნობ, თითქოს იმ ისტორიის ნაწილი ვარ, რომლის ნაწილად ყოფნაზე არაფერი ვიცოდი, მაგრამ მე ამერიკელი ვარ. მონარქიის მომხრე არ ვარ. მაგის არ მწამს... ვერ ვხვდები, საზოგადოება მონარქებისა და ლიდერების ირგვლივ რატომ განვითარდა და ეს ყველაფერი მომავალ თაობებს რატომ გადასცეს. ნებისმიერ საზოგადოებასა და ცივილიზაციაში ასე იყო. ვფიქრობ, ახლა, დემოკრატიის წყალობით, უკეთეს ადგილას ვართ და ამ გზაზე უნდა გავაგრძელოთ სიარული", — განაცხადა ოდენკირკმა პასუხების მიღებამდე.

როგორც კი გაიგო, რომ მეფე ჩარლზ III-ის შორეული ბიძაშვილია, მსახიობს სიცილი აუტყდა და იხუმრა, რომ შესაძლოა, მონარქიაზე აზრი შეიცვალოს.

"შეიძლება აზრი შევიცვალო! ძალიან სასაცილოა. სიგიჟეა!", — ამბობს მსახიობი გადაცემის ანონსში.

გადაცემა ეთერში 30 იანვარს გავა. იქნებ ისიც გავიგოთ, არსებობს თუ არა რამე გზა, რომ სამეფო ტახტი სოლ გუდმენის ხელში აღმოჩნდეს.