არიანა გრანდე რამდენიმეწლიანი პაუზის შემდეგ დაბრუნდა. მომღერალმა ბოლო ალბომი 2020 წელს გამოუშვა, ახლა კი სიმღერით Yes, And? გულშემატკივრებს ახალი მუსიკალური ერის დაწყება ამცნო.

სიმღერა წარმოდგენას გვიქმნის იმაზე, როგორი შინაარსისა და სტილის იქნება მომღერლის მეშვიდე ალბომი. Yes, And? არიანასთვის დამახასიათებელი მხიარული მელოდიით გამოირჩევა, რომელიც მსმენელს ცეკვისკენ უბიძგებს და 80-იანებისთვის დამახასიათებელი მუსიკით მადონას ლეგენდარულ სიმღერა Vogue-საც მოგაგონებთ.

არიანა ტრეკით კრიტიკოსებს პასუხობს და ამბობს, რომ საკუთარ თავს ავთენტურად გამოხატავს და თავის სხეულში თავს კომფორტულად გრძნობს. სიმღერას ფონად რამდენიმე ფრაზას გასდევს, რომელიც არიანაზე კრიტიკოსებს უთქვამთ, პარალელურად კი, გრანდე იმაზე მღერის, რომ სხვა ადამიანების აზრის გამო შეცვლას არ აპირებს.

მომღერალმა სიმღერა პროდიუსერ მაქს მარტინთან ერთად შექმნა, რომელსაც აქამდე ბრიტნი სპირსთან, ტეილორ სვიფტთან და სხვა ვარსკვლავებთან უმუშავია. არიანა სინგლზე გადაღებულ მუსიკალურ კლიპს რამდენიმე საათში გამოუშვებს.

მოუსმინეთ Yes, And?-ს აქ: