ეს Samsung-ის ახალი ტელევიზორია, რომელიც სპეციალურად კინოთეატრებისთვის გამოუშვეს. მაგრამ, თუ ბევრი ფული გაქვთ და შესაბამისად, დიდი სახლიც, შეგიძლიათ საძინებელშიც ჩამოიკიდოთ.

ტელევიზორის დიაგონალის ზომა 10.3 მეტრია და სრულ 4K-რეზოლუციაზე აჩვენებს (4 096 x 2 160 პიქსელზე). აღჭურვილია HDR ფუნქციით, აქვს 500 ნიტი სიკაშკაშე (რაც, ერთ კვადრატულ მეტრზე 500 სანთლის შუქს უდრის).

Samsung-ის გავრცელებულ პრეს-რელიზში ნათქვამია, რომ LED ტელევიზორს კინოთეატრებში მოქმედ პროექტორებზე ათჯერ უკეთესი გამოსახულება აქვს.

მწარმოებლის თქმით, ტელევიზორი "დაუმახინჯებელ" სურათს აჩვენებს, ღრმა შავით, სუფთა თეთრით, კაშკაშა ფერებით და "თითქმის უსასრულო" კონტრასტის შეფარდებით. მოწყობილობამ, შესაძლოა, საგრძნობლად გააუმჯობესოს 3D ფილმების გამოსახულება, რომლებიც, როგორც წესი, პროექცირების სისტემებში არსებული პოლარიზებული ლინზების გამო, ოდნავ ბნელი და მკრთალია.

ტელევიზორის პრეზენტაცია კორეაში, Lotte-ს კინოთეატრში შედგა. ეს პირველი კომერციული კინო-დარბაზია, რომელშიც LED ეკრანი დაამონტაჟეს.