ცნობილი ამერიკელი მომღერალი და მსახიობი სელენა გომესი, როგორც ჩანს, მუსიკალური კარიერის დასრულებას განიხილავს. სულ ახლახან, ერთ-ერთ პოდკასტში სტუმრობისას, გომესმა განაცხადა, რომ მომავალში მხოლოდ ერთ ალბომს თუ გამოუშვებს.

"ვფიქრობ, ჩემში ერთი ალბომიღაა დარჩენილი", — ამბობს პოპვარსკვლავი, — "ასაკის მატებასთან ერთად ვხვდები, რომ ისეთი რამის პოვნა მსურს, რასაც დარჩენილი ცხოვრება გავაკეთებ".

გომესის თქმით, ასეთ საქმედ მსახიობობას მიიჩნევს. მეტიც, მან აღნიშნა, რომ თავდაპირველად, ბავშვობაში, მისი მიზნები მხოლოდ სამსახიობო კარიერას უკავშირდებოდა, მუსიკალური საქმიანობა კი მხოლოდ იმიტომ დაიწყო, რომ დისნეიმ ალბომის გამოშვება შესთავაზა. 2000-იანებში გომესმა პოპულარობა სწორედ დისნეის თინეიჯერულ სიტკომში, Wizards of Waverly Place, მონაწილეობით მოიპოვა.

///

"ვიფიქრე, გავერთობოდი", — ასე იხსენებს გომესი მიზეზს, რატომ დათანხმდა ალბომის გამოშვებას, — "უფრო მეტად კი მეგონა, რომ [მუსიკა] ჩემი საყვარელი ჰობი გახდებოდა. მთელი ჩემი დროის მომღერლობისთვის დათმობას მართლა არ ვაპირებდი, მაგრამ, როგორც ჩანს, ეს ჰობი სხვა რამედ იქცა".

ეს სხვა რამე კი სამი სტუდიური ალბომი და ერთიმეორეზე წარმატებული სინგლებია. ამ ყველაფერმა გომესს არაერთი პრესტიჟული ჯილდოც მოუტანა, მათ შორის, American Music Award, Billboard Music Award და MTV Video Music Award. ამასთან, იგი ორჯერ იყო ნომინირებული გრემის დაჯილდოებაზე.

არანაკლები წარმატება ხვდა წილად სელენას სამსახიობო კარიერას, რომელიც ემის ოთხგზის და ოქროს გლობუსის ორგზის ნომინანტობით აღინიშნა. წარმატებულ კინო და სატელევიზიო პროექტებში მონაწილეობის გარდა, სელენა გომესზე გადაღებულია დოკუმენტური ფილმი Selena Gomez: My Mind & Me, სადაც პოპვარსკვლავმა თავის ცხოვრებაზე, პოპულარობასა და მენტალური ჯანმრთელობის საკითხებზე ღიად ისაუბრა. როგორც გომესი პოდკასტში აღნიშნავს, ნაწილობრივ სწორედ მენტალური ჯანმრთელობის მდგომარეობამ უბიძგა, არჩევანი გაეკეთებინა მუსიკასა და მსახიობობას შორის.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...