დიდ ბრიტანეთში 18 წლის ჰაკერს, რომელმაც GTA VI-ის ვიზუალები თამაშის გამოსვლამდე გაავრცელა, სასამართლომ უვადო მენტალური მკურნალობა მიუსაჯა. ბრალდებული არიონ კურტაი საერთაშორისო კრიმინალური კიბერორგანიზაცია Lapsus$-ის ერთ-ერთი წევრია და დიდ კომპანიებს ესხმის თავს.

კურტაის ციხეში ჩასმა ადრე Nvidia-ისა და BT/EE-ის დაჰაკვის გამო დაემუქრა, თუმცა აუტიზმის დიაგნოზის გამო გირაოთი გაათავისუფლეს, ლეპტოპი კი ჩამოართვეს. მიუხედავად ამისა, არიონმა ტელევიზორისა და მობილური ტელეფონის მეშვეობით, მაინც მოახერხა GTA-ის მფლობელი კომპანია Rockstar-ის შიდა სისტემის გატეხა და თამაშის 90-მდე კლიპი გაავრცელა.

მას შემდეგ, რაც ბიჭი დაიჭირეს, ის სხვა პატიმრებს თავს ესხმოდა და ამბობდა, რომ კიბერდანაშაულების ჩადენას პირველი შესაძლებლობისთანავე განაგრძობდა. აუტიზმის მძიმე ფორმის გამო სასამართლომ მისი ციხეში ჩასმა სწორად არ მიიჩნია და გადაწყვეტილების მიღება ნაფიც მსაჯულებს მიანდო.

საბოლოოდ, სასამართლოს განაჩენის მიხედვით, კურტაი საზოგადოებისთვის საფრთხეს წარმოადგენს და უვადო მენტალური მკურნალობა უნდა მიესაჯოს. ის იქამდე იქნება საავადმყოფოში ექიმების მეთვალყურეობის ქვეშ, სანამ ბიჭს საზოგადოებისთვის საფრთხის მომტანად აღარ ჩათვლიან.