ამბობენ ხოლმე, რომ ბალენსიაგა და მისი კრეატიული დირექტორი დემნა მოდის ინდუსტრიას ხშირად "ამასხარავებენ" უჩვეულო სამოსის გამოშვებით. ბალენსიაგამ ხომ სხვადასხვა დროს გამოუშვა მაღალპლატფორმიანი კროკები, "კოსმოსური ფეხსაცმელი", ნაგვის პარკის შთაგონებით შექმნილი ჩანთა და გაცვეთილ-დაგლეჯილი კედები. ახლა კი, როგორც ჩანს, ქვედაბოლოს ჯერი დადგა — უფრო სწორად პირსახოცის ქვედაბოლოსი.

მოდის სახლის მორიგი სიახლე სწორედ ხაოიანი პირსახოცის ქვედაბოლოა. ის ბალენსიაგას 2024 წლის საგაზაფხულო კოლექციაში შედის, სამოსის ფასი კი $925-ს შეადგენს.

ფოტო: Balenciaga

როგორც ვებგვერდზე გამოქვეყნებული აღწერიდან ვიგებთ, მუხლამდე სიგრძის ქვედაბოლო უნისექსია, პირსახოცის ხაოიან ზედაპირზე კი ბალენსიაგას ლოგოცაა ამოქარგული. სამოსს წელზე მოსარგებად 2 ღილი აქვს, დასარეგულირებლად კი ქამარიც მოჰყვება.

აღსანიშნავია, რომ მსგავსი პროდუქტი Amazon-ზეც იყიდება — თანაც, ამ ვერსიას ჯიბე აქვს და ბევრად იაფიც ღირს.

ბალენსიაგამ კი რამდენიმე კვირის წინ 2024 წლის საზაფხულო კოლექციაც წარადგინა. ჩვენება იმით იყო გამორჩეული, რომ ის დემნას დედამ გახსნა და დიზაინერის პარტნიორმა დაასრულა.

გასულ წელს მომხდარი სკანდალის შემდეგ, როცა ბალენსიაგა ბავშვების სექსუალიზებაში დაადანაშაულეს, დემნამ განაცხადა, რომ მოდის და ბრენდის "ფესვებთან დაბრუნება" გადაწყვიტა — "რაც იმიჯის ან ხმაურის კი არა, ხარისხიანი სამოსის შექმნაა".