პენსილვანიელი ქალი, რომელმაც ლატარიის ბილეთით 3 მილიონი დოლარი მოიგო, სიმსივნით დაავადებული ქმრისთვის საოცნებო მოგზაურობას გეგმავს. პენი რიპმა ლატარიის ბილეთი 16 ოქტომბერს შეიძინა. როგორც ქალი იხსენებს, ექიმთან ვიზიტის შემდეგ მაღაზიაში გაიარა და რამდენიმე ლატარიის ბილეთი შეიძინა, რომელთაგან ერთ-ერთით 3 მილიონი დოლარი მოიგო.

"30-დოლარიანი ბილეთი გადავფხიკე და გავიფიქრე, რომ რაღაცას სწორად ვერ ვხედავდი, შემდეგ კი ტირილი დავიწყე. ახლა შევძლებ ჩემს ქმარს ის ოცნება ავუხდინო, რომელიც ყოველთვის სურდა", — განაცხადა ლატარიის გამარჯვებულმა.

პენის ქმარს მე-3 სტადიის სიმსივნე 2021 წელს დაუდგინეს, როცა ის ექიმთან თიაქრის შესამოწმებლად მივიდა. ექიმების თქმით, მას საკმაოდ იშვიათი სიმსივნე აქვს, რომელიც ჩვეულებრივ ბავშვებშია გავრცელებული.

"არ ვიცით, მის გვერდით რამდენი ხანი ვიქნებით. ჩემს ქმარს მუშაობა აღარ შეუძლია და ახლა მე ვცდილობ, მასზე ვიზრუნო, თუმცა ჯანმრთელობის პრობლემები თავადაც მაქვს", — განაცხადა პენიმ.

წყვილი ახლა საოცნებო მოგზაურობას გეგმავს, თუმცა არც სხვების დახმარება ავიწყდება. პენის თქმით, წლების განმავლობაში უამრავი ადამიანი ფინანსურად ეხმარებოდა და ახლა შეუძლია, იმათ დაუდგეს გვერდში, ვინც ყველაზე რთულ პერიოდში დაეხმარა.