სულაც არაა გასაკვირი, რომ ახალი ამბებით დატვირთული აღმოჩნდა გასული კვირაც. კულტურისა და პოპკულტურის სიახლეებთან ერთად, საზოგადოებისა და მედიის ყურადღება მიიქცია დაძაბულმა გეოპოლიტიკურმა ვითარებამ ახლო აღმოსავლეთში. იმისათვის, რომ კვირის ყველაზე მნიშვნელოვანი ამბებიდან არცერთი გამოგრჩეს, ტრადიციულად, ერთ სტატიაში მოვუყარეთ თავი ყველა მათგანს.

1. მარია კალასის როლში ანჯელინა ჯოლის პირველი ფოტოები გავრცელდა

რეალურ ფაქტებზე დაფუძნებული ფილმი Maria ცნობილი საოპერო მომღერლის ცხოვრების შესახებ მოგვითხრობს. ფილმი მარია კალასის მსოფლიო აღიარებისა და ამავდროულად, მომღერლის ტრაგიკული ისტორიის შესახებაც გვიამბობს. ფილმს უკვე 8 კვირაა პარიზში, საბერძნეთში, ბუდაპეშტსა და მილანში იღებენ.

უფრო ვრცლად წაიკითხე აქ.

2. The Crown-ის ბოლო სეზონის ტრეილერი გავრცელდა

სერიალის მე-6 სეზონი სამეფო ოჯახში 2000 წლის შემდგომ მომხდარ ამბებზე მოგვიყვება. სეზონი ორ ნაწილად გამოვა: პირველი ნაწილის პრემიერა 16 ნოემბერს იგეგმება, მეორის კი — 14 დეკემბერს.

უფრო ვრცლად წაიკითხე აქ.

3. ცნობილი ადამიანები ჰამასის ისრაელზე თავდასხმას გამოეხმაურნენ

დაჯგუფება ჰამასის ისრაელზე თავდასხმის შემდეგ, ებრაულ სახელმწიფოს სოლიდარობა და მხარდაჭერა არაერთმა ცნობილმა ადამიანმა გამოუცხადა, მათ შორის, მადონამ, ნატალი პორტმანმა და გალ გადოთმა.

უფრო ვრცლად წაიკითხე აქ.

4. ჰამასის მხარდაჭერის გამო ყოფილ პორნოვარსკვლავ მია ხალიფას კონტრაქტი შეუწყვიტეს

ხალიფამ სოციალურ ქსელ X-ზე (ყოფილ ტვიტერზე) ისრაელში მიმდინარე კონფლიქტის შესახებ რამდენიმე პოსტი გამოაქვეყნა და თავდასხმაზე პასუხისმგებელ ჰამასს, რომელსაც არაერთი ქვეყანა ტერორისტულ დაჯგუფებად მიიჩნევს, მხარდამჭერი კომენტარები მიუძღვნა. განცხადებებს მომხმარებლების ნაწილის მხრიდან მწვავე კრიტიკა მოჰყვა.

უფრო ვრცლად წაიკითხე აქ.

5. ქართველი მომღერალი Nini Iris ამერიკული ვოისის კონკურსში ჩაერთო

ნინი ბრეგვაძემ, სასცენო სახელით Nini Iris, "ბრმა ქასთინგზე" სიმღერა I See Red შეასრულა და ოთხივე მწვრთნელი ერთიმეორის მიყოლებით შემოატრიალა. ირლანდიელმა პოპვარსკვლავმა და ერთ-ერთმა მწვრთნელმა, ნაილ ჰორანმა, ნინის კონკურსის "პოტენციური გამარჯვებული" უწოდა.

უფრო ვრცლად წაიკითხე აქ.

6. ქართველი კონკურსანტი გამოჩნდა გერმანული ვოისის სცენაზეც

19 წლის ქართველმა მომღერალმა ლიზი გოზალიშვილმა გერმანული მეგაშოუს შესარჩევი ეტაპი წარმატებით გადალახა და კონკურსში ჩაერთო. ლიზიმ, რომელიც გერმანიაში ცხოვრობს და სწავლობს, "ბრმა ქასთინგზე" მაიკლ ჯექსონის სიმღერა Earth Song შეასრულა და ჟიურის დიდი მოწონებაც დაიმსახურა.

უფრო ვრცლად წაიკითხე აქ.

7. ტიმოთი შალამეს მონაწილეობით გადაღებული ახალი ფილმის, ვონკას, პოსტერები გავრცელდა

ეს ფილმი როალდ დალის ცნობილი რომანის, ჩარლი და შოკოლადის ქარხანა, მორიგი ეკრანიზაციაა. ფილმი, რომელშიც მთავარ როლს ტიმოთი შალამე ასრულებს, ვილი ვონკას ახალგაზრდობაზე მოგვითხრობს იმ დრომდე, სანამ ის ცნობილ შოკოლადის ქარხანას გახსნიდა.

უფრო ვრცლად წაიკითხე აქ.

8. სერიალ Suits-ის დაბრუნება დაანონსდა

სერიალის სპინოფზე კვლავაც რეჟისორი აარონ კორში იმუშავებს. მასში მოქმედება კი ისევ ნიუ-იორკის ერთ-ერთი იურიდიული ფირმის თანამშრომლების, მათ შორის, ჰარვი სპექტერისა და მაიკ როსის გარშემო განვითარდება.

უფრო ვრცლად წაიკითხე აქ.

9. სასამართლომ ჯონასისა და ტერნერის შვილების მეურვეობის საქმეზე განაჩენი გამოიტანა

სასამართლოს გადაწყვეტილებით ორივე მშობელს 3 წლის ვილასა და 15 თვის დელფინზე თანაბარი უფლებები ექნება და ბავშვებთან დროს ერთნაირი ინტერვალებით გაატარებენ. განაჩენი 2024 წლის დასაწყისამდე იმოქმედებს, შემდეგ კი გადაიხედება.

უფრო ვრცლად წაიკითხე აქ.

10. გამოვიდა სიმღერა, რომელიც საქართველოს საბავშვო ევროვიზია 2023-ზე წარადგენს

სიმღერა, სახელწოდებით Over The Sky, მებო ნუცუბიძისა და ბეთხოს (ირაკლი მანჩხაშვილი) ნამუშევარია. მას ნოემბერში, საფრანგეთის ქალაქ ნიცაში შეასრულებენ ანასტასია ვასაძე, ნიკოლოზ ხარატი და ოთო ბაზერაშვილი.

უფრო ვრცლად წაიკითხე აქ.