ბრიტანელი მეცნიერები სრულიად ახალი კვლევის ჩასატარებლად ემზადებიან და ამჯერად, ალკოჰოლიზმის განკურნებაში MDMA-ს როლის მნიშვნელობის შესწავლას აპირებენ. მათი ვარაუდით, MDMA-ს დახმარებით ალკოჰოლზე მძიმედ დამოკიდებული ადამიანები ამ მავნე ჩვევისგან თავის დაღწევას შეძლებენ.

Imperial College London-ის მკვლევრებმა განაცხადეს, რომ მათ წარმატებით გაიარეს კვლევის ჩასატარებელი ყველა წინასწარი ეტაპი და ექსპერიმენტის დასაწყებად ნებართვა მიიღეს. The Guardian-ის ცნობით, კვლევა ინგლისში, ქალაქ ბრისტოლში ჩატარდება. დასაწყისისთვის შეირჩევა 20 პაციენტი, რომლებიც ალკოჰოლიზმის დამარცხებას წარსულში სხვა მეთოდებით ცდილობდნენ, თუმცა უშედეგოდ. კვლევის პროცესში, შერჩეული პაციენტები ფსიქოთერაპიულ სესიებს გაივლიან, რა დროსაც ისინი სუფთა MDMA-ს ზემოქმედების ქვეშ იქნებიან.

MDMA არის ემპათოგენი, ცნობილი როგორც ნარკოტიკი, რომელიც სიყვარულის განცდებს ქმნის, ადამიანს უფრო მეტად სოციალურსა და ემპათიურს ხდის. მკვლევარების ჰიპოთეზის მიხედვით, სწორედ ეს ეფექტი დაეხმარებათ ალკოჰოლზე დამოკიდებულ ადამიანებს ამ მავნე ჩვევის დაძლევაში, თერაპევტთან მეტ გახსნილობაში და ა.შ.

ადრე ჩატარებულმა კლინიკურმა კვლევებმა აჩვენა, რომ MDMA-ის დახმარებით ჩატარებული თერაპიები ადამიანებს ფსიქოლოგიური ტრავმების დაძლევაში ეხმარება. 2010 წელს ჩატარებული მცირე კვლევის თანახმად, პაციენტების 80%-ს, რომლებსაც მწვავე ფსიქოლოგიური ტრავმები აღენიშნებოდათ, MDMA-თი ჩატარებული თერაპიების შემდეგ სიმპტომები გაუქრათ.

სხვათა შორის, ამ კვლევის ერთ-ერთმა ავტორმა MDMA-ს მნიშვნელობაზე TED-ზე 2016 წლის ზაფხულში ისაუბრა.

როდის გამოქვეყნდება კვლევის შედეგები, ჯერჯერობით უცნობია. შეგახსენებთ, რომ MDMA-ს სამედიცინო მიზნებით გამოყენება ა.შ.შ.-ში, შესაძლოა, ლეგალური გახდეს.