ილონ მასკი და კოსმოსური ბიზნესის სხვა გამოჩენილი წარმომადგენლები საუბრობენ მომავალზე, რომელშიც მარსი ათასობით ადამიანის სახლი გახდება. ამის პარალელურად, ვითარდება კოსმოსური ტურიზმიც.

შესაბამისად, ჩნდება შეკითხვა, შეგვეძლება თუ არა კოსმოსში სექსი და რაც ასევე მნიშვნელოვანია, რა იქნება რეპროდუქციის მხრივ?

ასევე: NASA-ს მეცნიერი: სექსი კოსმოსში შესანიშნავი იქნება

უპირველეს ყოვლისა, მეცნიერებმა უნდა დაადგინონ, შეუძლიათ თუ არა ადამიანებს რეპროდუცირება "მტრულ" კოსმოსურ გარემოში, რომელიც სავსეა მავნე რადიაციით, მოკლებულია გრავიტაციასა და არ გააჩნია მნიშვნელოვანი რესურსები.

და აი ახლა, ნიდერლანდებში დაფუძნებულმა სტარტაპმა, SpaceBorn United-მა ამ შეკითხვებზე პასუხის გაცემა საკუთარ თავზე აიღო.

ექსპერიმენტების სერია მილსადენში

BBC იტყობინება, რომ კომპანიამ ინ-ვიტრო განაყოფიერების (IVF) პატარა მოწყობილობა და ემბრიონის ინკუბატორი შექმნა. ახლა მკვლევრებს მოწყობილობის კოსმოსში გაშვება სურთ.

კომპანიამ CD-ROM-ის ზომის პროტოტიპი შექმნა, რომელიც მიკროფლუიდურ ტექნოლოგიას IVF-სთვის გამოიყენებს. მოწყობილობის დისკი დედამიწის გრავიტაციის სიმულირებას ახდენს.

მკვლევრები ექსპერიმენტების დაწყებას ცხოველების უჯრედებით დაიწყებენ, უკვე ამის შემდეგ ადამიანის უჯრედებზე გადავლენ.

"თუ ახალი პლანეტების ათვისება გვსურს, როგორიცაა მარსი, ეს რეპროდუქციის გამოწვევის გადაჭრას საჭიროებს", — განუცხადა BBC-ის SpaceBorn United-ის აღმასრულებელმა დირექტორმა, ეგბერტ ედელბრუკმა.

ფოტო: Space Born

პირველი კოსმოსური ექსპერიმენტები თაგვის უჯრედებზე

ამ მიზნის მისაღწევად, კომპანია ექსპერიმენტების კოსმოსში დასაწყებად ემზადება. მისიების სერიას ARTIS ერქმევა.

მისიები მომდევნო ხუთი წლის განმავლობაში დაიწყება. საწყისი ექსპერიმენტები თაგვის უჯრედების გამოყენებით ჩატარდება. ემბრიონები ბუნებრივ საშვილოსნოში გადაინერგება და ორსულობისა და მშობიარობის შემდგომი ფაზები დედამიწაზე მოხდება.

თუ ეს ყველაფერი წარმატებით ჩაივლის, შემდეგი ადამიანის ღეროვანი უჯრედები იქნება.

"ექსპერიმენტები ნათელს მოჰფენს რა უნდა იყოს გრავიტაციის მინიმალური დონე ემბრიონის ჯანსაღი განვითარებისთვის", — აღნიშნულია ვებსაიტზე.

ამ მიზნის მიღწევას რამდენიმე წელი დასჭირდება

თუ რეგულაციებს გავითვალისწინებთ, კომპანიას მიზნის მიღწევამდე ჯერ კიდევ ბევრი წელი აშორებს.

კოსმოსში ადამიანის რეპროდუქციასთან დაკავშირებული გამოწვევები და რისკები გასათვალისწინებელია. შესაბამისად, მომზადებას დრო დასჭირდება.

გარდა ამისა, მარსის კოლონიებისთვის საჭირო იქნება სიცოცხლის მხარდაჭერის გაუმჯობესებული სისტემები, რომლებსაც შეუძლიათ უზრუნველყონ უსაფრთხო და სტაბილური გარემო, როგორც ორსული ქალებისთვის, ისე ჩვილებისთვის.

თუმცა, ერთი რამ ფაქტია, ამ მიმართულებით კვლევები უკვე იწყება და ეს აღნიშვნას იმსახურებს.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.