იხვი, სახელად ლაშა, მზრუნველ პატრონს ეძებს. იხვი მზიურის პარკის ტერიტორიაზე დედა-შვილმა იპოვა და გადაარჩინა. მზიურის პარკში დატოვებული იხვის შესახებ ინფორმაციას ცხოველთა გადარჩენის სახალხო ფრონტი ავრცელებს.

"უამრავ მიუსაფარ ცხოველს, ყვავსაც გაუვლია ჩემს ხელში, მაგრამ იხვი პირველი შემთხვევაა. დიდი ალბათობით, სახლში გაზარდეს, გაერთნენ და მერე მზიურის პარკში დატოვეს. საცოდავად დაბაჯბაჯებდა და ლამის ძაღლების მსხვერპლი გახდა, მაგრამ კეთილმა დედამ და ბიჭმა გადაარჩინეს და ლაშაც დაარქვეს. ჰოდა, ლაშა ჯერ კიდევ თინეიჯერია, მაგრამ ეძებს მზრუნველ პატრონს, რომელმაც იცის მოვლა და აუცილებელი მოთხოვნაა არ დაკლას", — ვკითხულობთ ცხოველთა გადარჩენის სახალხო ფრონტის ფეისბუქის პოსტში.

ფოტო: ცხოველთა გადარჩენის სახალხო ფრონტი / Facebook

ვისაც სურს, იხვის ახალი პატრონი გახდეს, ცხოველთა გადარჩენის სახალხო ფრონტს ფეისბუქზე შეუძლია დაუკავშირდეს.