25-28 მაისს თბილისის წიგნის საერთაშორისო ფესტივალი იმართება, წიგნის მოყვარულების დიდი დღესასწაული.

ქარჩხაძის გამომცემლობა ფესტივალის ტრადიციული და უცვლელი მონაწილეა. რა თქმა უნდა, ყველა სულმოუთქმელად ელის საფესტივალო სიახლეებს, ახალ თარგმანებს. გამომცემლობაში იმაზეც იზრუნეს, რომ ბევრისთვის მონატრებული, ძვირფასი წიგნები განახლებული ტირაჟით დაბეჭდილიყო. ამ სტატიაში მათ შესახებ მეტს გაიგებთ.

ჯემალ ქარჩხაძე — განზომილება

განზომილება დაუმთავრებელი რომანია, რომელსაც ჯემალ ქარჩხაძე მრავალი წლის მანძილზე წერდა. რომანში 80-იანი წლების მიწურულის საქართველოა ასახული, როდესაც საბჭოთა სისტემა საბოლოოდ იშლება და საზოგადოება სრულიად მოუმზადებელი აღმოჩნდება ახალი რეალობების წინაშე. ეს არ არის წიგნი, რომელიც უნდა წაიკითხო, ეს არის წიგნი, რომელიც უნდა იკითხო.

ჯემალ ქარჩხაძე — მარტოობის ჩუმი ედემი

წიგნში პირველად ქვეყნდება ჯემალ ქარჩხაძის "უბის წიგნაკის ჩანაწერები". ჩანაწერები სხვადასხვა დროსაა დაწერილი და რამდენიმე ბლოკნოტშია გაბნეული, ესენია: რომან განზომილებისთვის განკუთვნილი ჩანაწერები, პუბლიცისტური წერილებისათვის გაკეთებული მონახაზები, სხვადასხვა ხასიათის მცირე ტექსტები. წიგნში შესულია ასევე სტატია — რამდენიმე ფსიქოლოგიური შტრიხი ჩვენი უახლესი ისტორიისათვის, რომელიც ჯემალ ქარჩხაძის ერთადერთ კონცეპტუალურ ესეს წარმოადგენს.

საბავშვო ვეფხისტყაოსანი

ტექსტი: ლეილა ბეროშვილი

ილუსტრაციები: ნინო ჩიტაიშვილი

საბავშვო ვეფხისტყაოსანი წიგნია, რომელშიც თითოეული გვერდი ილუსტრირებული. ამ წიგნში ნათლად, საბავშვო ენით, გადმოცემულია ვეფხისტყაოსნის მთელი ამბავი, რაც ხელს უწყობს წიგნს საიმედო მეგზური გახდეს ბავშვებისთვის ვეფხისტყაოსნის სიბრძნის შეცნობის გზაზე. ამბავს არა მხოლოდ ტექსტი, არამედ საოცრად შერჩეული, წიგნისთვის შექმნილი ილუსტრაციებიც გვიყვება.

საბავშვო ბიბლია

წიგნში მოთხრობილია ყველასათვის ცნობილი და საყვარელი ამბები ძველი და ახალი აღთქმიდან. ტრადიციული ტექსტიდან გადახვევის გარეშე, ეს ამბები ბავშვებისთვის ნათლად და გასაგებადაა მოწოდებული. პატარა მკითხველებსა და მსმენელებს მეგზურობას გაუწევს ბიბლიური სიბრძნის შეცნობის გზაზე. მნიშვნელოვანია, რომ თითოეული გვერდი ილუსტრირებულია, ამბის შესაბამისია, რაც პატარებს ტექსტთან დაახლოებას უადვილებს.

და ბოლოს, ქარჩხაძის გამომცემლობას სამი მნიშვნელოვანი სიახლე აქვს.

ორი ახალი თარგმანი: ანა ბერნსის მერძევე და მეგი ო’ფერელის ჰამნეტი.

ჯემალ ქარჩხაძის იგი დიდი ხანია ქართველი მკითხველის ერთ-ერთი რჩეული, ძვირფასი და საყვარელი წიგნია. რა თქმა უნდა, მნიშვნელოვანია, რომ თანამედროვე კლასიკოს ავტორს რაც შეიძლება მეტი ადამიანი გაეცნოს, შესაბამისად, იგი პირველად ითარგმნა ინგლისურად. ფესტივალის სტუმრებს ეს სიახლეც ქარჩხაძის სტენდთან დახვდება.

და კიდევ, წელს თბილისის წიგნის საერთაშორისო ფესტივალზე მისულ ერთგულ მკითხველს ქარჩხაძის გამომცემლობის სტენდი სრულებით განახლებული დახვდება და ერთ-ერთი წიგნის კონცეფციაზე იქნება აგებული.