აშშ-ში, კოლორადოს შტატში მცხოვრები კაცი, რომელიც ავტომობილის მართვისას სიჩქარის გადაჭარბებისთვის დააკავეს, ამტკიცებს, რომ საჭესთან ძაღლი იჯდა.

ბრალდებული ქალაქ სპრინგფილდის მახლობლად, 84 კმ/სთ სიჩქარით მოძრაობდა ზონაში, სადაც დაშვებული ლიმიტი 48 კმ/სთ იყო. იგი ჰყვება, რომ დაკავებამდე ცოტა ხნით ადრე მგზავრის სავარძელში მჯდომ თავის ძაღლს გაუცვალა ადგილი.

პოლიციის განცხადებით, დაკავებისას კაცს აშკარად ეტყობოდა ალკოჰოლური თრობის ნიშნები, თუმცა, ამაზე კითხვის დასმის შემდეგ იგი გაიქცა.

საბოლოოდ, კაცი მაინც დააკავეს და განყოფილებაში გადაყვანამდე გამოსაფხიზლებლად საავადმყოფოში გაგზავნეს. ამასთან, გაირკვა, რომ მის სახელზე უკვე გაცემული იყო დაპატიმრების ორი ბრძანება შტატის სხვა ქალაქში.

რაც შეეხება ძაღლს, პოლიცია აკონკრეტებს, რომ მისი პატრონის მტკიცების მიუხედავად, ცუგა უდანაშაულოა.

"სანამ ბრალდებული საპატიმროშია, ძაღლი მისი პატრონის ნაცნობს ჩაბარდა მოსავლელად", — ვკითხულობთ პოლიციის განცხადებაში, — "მის წინააღმდეგ საქმე არ აღიძვრება, ის მხოლოდ გაფრთხილებით გათავისუფლდა".