2023 წლის ევროვიზიის სიმღერის კონკურსი დაიწყო — 9 მაისს ლივერპულმა მასშტაბური მუსიკალური ფესტივალის პირველ ნახევარფინალს უმასპინძლა და ათი ფინალისტის ვინაობაც გამოარკვია.

თუმცა, წინ არის მეორე ნახევარფინალი, რომელშიც საქართველო იღებს მონაწილეობას. წლევანდელ ევროვიზიაზე ჩვენს ქვეყანას ირუ წარადგენს, სიმღერით Echo. მომღერალი კონკურსზე 11 მაისს, თბილისის დროით საღამოს 11 საათზე, მე-11 ნომრად წარდგება მაყურებლის წინაშე. აღსანიშნავია, რომ წელს ფინალისტების გამოვლენაში მხოლოდ ტელემაყურებელი მონაწილეობს, შესაბამისად, ქართველი მონაწილის ფინალში გადასასვლელად გულშემატკივრის აქტიური მხარდაჭერაა საჭირო.

რა უნდა იცოდეთ, თუკი ევროვიზიაზე საქართველოს მხარდაჭერა გსურთ

  • საქართველოდან ქართველ კონკურსანტს ხმას ვერ მისცემთ;
  • ხმის მიცემა იწყება მხოლოდ მას შემდეგ, რაც სცენაზე ყველა კონკურსანტი გამოვა და შოუს წამყვანები გამოაცხადებენ პროცესის დაწყებას;
  • თუკი მეორე ნახევარფინალში მონაწილე 16 ქვეყნიდან (იხილეთ ქვემოთ) რომელიმეში, დიდ ბრიტანეთში, ესპანეთში ან უკრაინაში იმყოფებით, ხმის მიცემის დეტალური ინსტრუქციისთვის უნდა უყუროთ შესაბამისი ქვეყნის საზოგადოებრივ მაუწყებელს; ტელეფონზე აკრიფოთ ეკრანზე გამოჩენილი ნომერი და ბოლოს — 11. ან გააგზავნოთ მოკლეტექსტური შეტყობინება — 11 — შესაბამის ნომერზე;
  • თუ კონკურსზე არამონაწილე ქვეყანაში იმყოფებით, ხმის მიცემას შეძლებთ ონლაინ, ვებგვერდზე: esc.vote
  • ხმის მიცემა მხოლოდ რამდენიმე წუთის განმავლობაში გრძელდება და მის დასრულებას წამყვანები გაცნობენ.

იმ შემთხვევაში, თუკი ქართველი მონაწილე ფინალში გადავა, დასკვნით შოუზე, 13 მაისს, იმავენაირად მისცემთ ხმას — ამჯერად, უკვე სხვა ნომრით, რომელიც მოგვიანებით გაირკვევა.

ევროვიზიის რიგით 67-ე კონკურსი გაერთიანებული სამეფოს ქალაქ ლივერპულში იმართება 9 მაისიდან 13 მაისამდე. 22 წლის ირუმ მასშტაბურ მუსიკალურ ფესტივალზე საქართველოს წარმომადგენლის სტატუსი საზოგადოებრივი მაუწყებლის პროექტ ვოისში გამარჯვებით მოიპოვა. აღსანიშნავია, რომ იგი ასევე იყო ჯგუფ ქენდის წევრი, რომელმაც 2011 წელს ჩვენს ქვეყანას საბავშვო ევროვიზიაზე მეორე გამარჯვება მოუტანა.

ასევე იხილეთ: