წლევანდელ ევროვიზიაზე საქართველოს ირუ ხეჩანოვი წარადგენს. 2023 წლის ევროვიზიაზე ქართველი კონკურსანტი სიმღერა Echo-ს შეასრულებს. სიმღერის ავტორი გიგა კუხიანიძეა, მისი ტექსტი კი ირუ ხეჩანოვსა და ბენი ქადაგიძეს ეკუთვნით. ვიდეორგოლის რეჟისორი ზაზა ორაშვილი გახლავთ.

ცოტა ხნის წინ BBC-მ წლევანდელი ევროვიზიის კონკურსანტების შესახებ სტატია გამოაქვეყნა, რომელშიც მონაწილე ქვეყნების წარმომადგენლების მუსიკალური ნომრებია განხილული და შეფასებული. სტატიაში ირუ ხეჩანოვისა და მისი სიმღერის შესახებაც ვხვდებით შემდეგ კომენტარს:

"ირუ ხეჩანოვმა The Voice Georgia-ს მე-5 სეზონში ლორინის 2012 წლის ევროვიზიის სიმღერის, Euphoria-ს, შესრულებით გაიმარჯვა. ახლა კი ირუ ევროვიზიაზე საკუთარი სიმღერით წარდგება და ლორინის წინააღმდეგ მოუწევს ბრძოლა, რომელიც კონკურსში შვედეთს წარმოადგენს. უი!

ირუ ამბობს, რომ სიმღერა "სიყვარულისთვის ბრძოლაზეა", მაგრამ ტექსტი ხელოვნური ინტელექტის ჩეტბოტის დაწერილს ჰგავს, მაგალითად, "სიყვარული უსიტყვოა", "ვგრძნობ, რომ ვპროგრესირებ" — ვკითხულობთ BBC-ს სტატიაში.

ბიბისის თქმით, სიმღერა სავსეა სამხედრო დასარტყამი ინსტრუმენტებით და ჯეიმს ბონდისეული სიმებიანი მუსიკით. მიუხედავად ამ ყველაფრისა, სიმღერა კინდერის კვერცხის მსგავსად ცარიელია.

შეგახსენებთ, რომ 22 წლის ირუ ხეჩანოვმა მასშტაბურ მუსიკალურ ფესტივალზე საქართველოს წარმომადგენლის სტატუსი საზოგადოებრივი მაუწყებლის პროექტ ვოისში გამარჯვებით მოიპოვა. აღსანიშნავია, რომ იგი ასევე იყო ჯგუფ ქენდის წევრი, რომელმაც 2011 წელს ჩვენს ქვეყანას საბავშვო ევროვიზიაზე მეორე გამარჯვება მოუტანა.

ევროვიზიის რიგით 67-ე კონკურსი გაერთიანებული სამეფოს ქალაქ ლივერპულში გაიმართება 9 მაისიდან 13 მაისამდე. უკვე ცნობილია, რომ საქართველო ფესტივალის მეორე ნახევარფინალში, 11 მაისს, წარდგება მაყურებლის წინაშე.