ალბათ არ არსებობს ადამიანი, რომელსაც პატარა მიზანი მაინც არ აქვს — ის, რასაც დღეს, ხვალ ან სულაც ამ კვირაში უნდა მიაღწიოს. თუმცა, იმ მცირე ხნის განმავლობაში, ბალიშზე თავის დადებიდან დაძინებამდე რომ გვაქვს, ბევრად უფრო დიდ და ამბიციურ მიზნებზე ვფიქრობთ ხოლმე. ეს ფიქრები შეიძლება ზოგჯერ სიზმრადაც გაგვყვეს, მაგრამ მთავარია, მხოლოდ იქ არ დარჩეს და რეალობად ვაქციოთ.

ცხოვრებისეული მიზნის მიღწევა დიდწილადაა დამოკიდებული გარდამტეხ მომენტებში ჩვენ მიერ მიღებულ გადაწყვეტილებებზე. ასეთი მომენტია, მაგალითად, პროფესიის არჩევა ან განათლების ახალ საფეხურზე გადასვლა. ამ დროს ყოველთვის ვფიქრდებით ხოლმე იმ შეკითხვაზე, ბავშვობაში უფროსები რომ სერიოზული სახით გვისვამდნენ — რა გინდა გამოხვიდე, დიდი რომ გაიზრდები?

გარდამტეხ მომენტებში, ცოტა არ იყოს, ვიბნევით ხოლმე, მაგრამ ეს სრულიად ნორმალურია. არ იცი, ვის უნდა მოუსმინო — ოჯახს, მეგობრებს, სრულიად უცნობ ადამიანებს თუ საკუთარი გულის ხმას. რეალურად, ყველაფერს სჯობს, მშვიდად დაჯდე და საკუთარ თავს მარტივი კითხვები დაუსვა.

უნივერსიტეტში აბარებ? აბა, ჰკითხე საკუთარ თავს, რატომ დგამ ამ ნაბიჯს. რას მოელი უნივერსიტეტისგან, რატომ გჭირდება განათლება და რაში გამოგადგება ის ბევრი წლის შემდეგ. ეს ყველაფერი მიგიყვანს ისეთ მნიშვნელოვან ცნებამდე, როგორიცაა ალტე.

ალტე ლათინური სიტყვაა და უმაღლეს წერტილს, მწვერვალს, ზენიტს ნიშნავს. შენი ალტე შენი პოტენციალის მაქსიმუმია — ის, რასაც საკუთარი შესაძლებლობებით, უნარ-ჩვევებითა და მონდომებით შეგიძლია მიაღწიო. ასე რომ, ყველას ჩვენი ცხოვრების ალტე გვაქვს.

ალტეს პოვნა ნიშნავს, მკაფიოდ გამოკვეთო დიდი თუ პატარა მიზნები, ფოკუსირდე საკუთარ თავზე და ნაკლებად იდარდო შენი და სხვისი მიღწევების შედარებაზე. აკი ვთქვით კიდეც, ალტე ძალიანაც ინდივიდუალური ამბავიაო.

და მაინც...

რაში დაგეხმარება ალტე?

ცნობილი ამერიკელი ფსიქოლოგის აბრაამ მასლოუს "მოთხოვნილებათა პირამიდა" აუცილებლად გეცოდინება. ისიც გემახსოვრება, რომ ყველანაირი ფიზიკური თუ ემოციური საჭიროების თავზე მასლოუმ თვითრეალიზაცია დააყენა. ეს არის სურვილი, ისწრაფოდე მეტისკენ. ან, ჩვენი ახალი ტერმინით რომ ვთქვათ, ვისწრაფოდეთ ალტესკენ.

ცხოვრების სხვადასხვა ეტაპზე განსხვავებული ალტე გვაქვს — ცხადია, სკოლაში, უნივერსიტეტში, სამსახურსა თუ პირად ცხოვრებაში, ერთნაირი მიზნები ვერ გვექნება. თუმცა, მნიშვნელოვანია, ყველა ეტაპზე ვფიქრობდეთ ცხოვრებისეულ მიზანზე და ვცდილობდეთ, მისკენ სისტემატურად გადავდგათ ერთი ნაბიჯი მაინც. ასე ნაბიჯ-ნაბიჯ მიმავალი შეამჩნევ, რომ საწადელთან უკვე ძალიან ახლოს ხარ.

საწადელი კი, რასაკვირველია, შენი ცხოვრების უმაღლესი წერტილია. შენი მომავალი მე, ანუ ის, ვინც გახდები. შენი თავის საუკეთესო ვერსია.

ალტეს პოვნა კი ძალიან მნიშვნელოვანია, მაგრამ არანაკლებ საჭიროა სწორ დროს სწორ ადგილას მოხვედრა. ეს დროის და ენერგიის დაზოგვაშიც დაგეხმარება. აუცილებელია, იპოვო ადგილი და ადამიანები, რომლებიც მიზნისკენ სწრაფვაში ხელს შეგიწყობენ.

რაც უნდა იყოს შენი ალტე, მის მიღწევას ალტე უნივერსიტეტში შეძლებ. აქ დაგხვდება ყველაფერი, რაც გჭირდება: საუკეთესო გარემო, ლექტორები, გაცვლითი პროგრამები და სხვა. რაც მთავარია, პიროვნული და კარიერული განვითარების უამრავი შესაძლებლობა. ეს ყველაფერი, რა თქმა უნდა, იმისთვის რომ შენი თავის საუკეთესო ვერსია შექმნა.