Marvel-ის კინოსამყაროს ვარსკვლავი ჯერემი რენერი მძიმედ დაშავდა და საავადმყოფოში გადაიყვანეს. მსახიობი უამინდობის დროს თოვლის საწმენდი მანქანით დაშავდა, რის შედეგადაც გულმკერდის ტრავმა და ორთოპედიული დაზიანებები მიიღო.

ოპერაციის შემდეგ ჯერემი რენერის მდგომარეობა სტაბილურია. "მისი მდგომარეობა კრიტიკულია, მაგრამ სტაბილური. დაზიანებები უამინდობის გამო, თოვლის წმენდისას მომხდარი უბედური შემთხვევის დროს მიიღო", — განაცხადა მსახიობის წარმომადგენელმა Deadline-თან ინტერვიუში.

ფოტო: Instagram

უბედური შემთხვევა ნევადის შტატში მოხდა, სადაც რენერს ტაჰოს ტბასთან ახლოს საკუთარი რანჩო აქვს. ახალ წელს მსახიობი ნევადას ეწვია, რომელსაც თავს ქარიშხალი დაატყდა და თოვლის გაწმენდის სამუშაოები სწორედ ამიტომ გახდა საჭირო. შემთხვევის ადგილიდან საავადმყოფოში რენერი ვერტმფრენით გადაიყვანეს.

შეგახსენებთ, რომ ჯერემი რენერი ოსკარზე ორჯერ იყო ნომინირებული. თავდაპირველად Hurt Locker-ში შესრულებული მთავარი როლისთვის, შემდეგ კი The Town-ში განსახიერებული მეორეხარისხოვანი როლისთვის. Marvel-ის გულშემატკივრები კი მსახიობს კლინტ ბარტონის როლით იცნობენ.