ლეგენდარული ბრაზილიელი ფეხბურთელი პელე 82 წლის ასაკში გარდაიცვალა.

ფეხბურთელი ნოემბერში საავადმყოფოში სასუნთქი გზების პრობლემებისა და მსხვილი ნაწლავის კიბოს თანმდევი გართულებების გამო გადაიყვანეს. გასულ კვირას საავადმყოფომ ინფორმაცია გაავრცელა, რომ პელეს მდგომარეობა უარესდებოდა.

60 წელზე მეტია, პელეს სახელი ფეხბურთის სინონიმად გამოიყენება. პელემ 4 მსოფლიო ჩემპიონატში ითამაშა და ჯერჯერობით ისტორიაში ერთადერთია, რომელმაც სამჯერ მოიგო.

"მე იმისთვის დავიბადე, რომ ფეხბურთი მეთამაშა, ისევე, როგორც ბეთჰოვენი დაიბადა მუსიკისთვის, მიქელანჯელო კი — ხატვისთვის", — განაცხადა ფეხბურთელმა.

ორშაბათს ვილა ბელმიროს სტადიონზე პელეს სამოქალაქო პანაშვიდი გაიმართება. პანაშვიდის შემდეგ სამგლოვიარო პროცესია გაიმართება სანტოსის ქუჩებში — პელეს ფანები იმ ქუჩაზეც ჩაივლიან, რომელზეც ფეხბურთელის 100 წლის დედა ცხოვრობს.