Models.com ყოველწლიურად სხვადასხვა კატეგორიაში წლის ყველაზე საინტერესო და წარმატებულ მოდელებს ასახელებს. გადაწყვეტილებას ინდუსტრიაში მოღვაწე ტოპ ფოტოგრაფები, რედაქტორები, სტილისტები და, რა თქმა უნდა, ფართო საზოგადოება და მოდის მოყვარულები იღებენ. ინდუსტრიის წარმომადგენლებისა და მკითხველის აზრი ხანდახან იყოფა და ზოგიერთ კატეგორიას ორი სხვადასხვა გამარჯვებული ჰყავს.

წელს პირველად ამ პრესტიჟულ სიაში ქართველი მოდელი მატილდა გვარლიანიც აღმოჩნდა. "ამომავალი ვარსკვლავის" კატეგორიაში მატილდა ჟურნალის მკითხველმა დაასახელა, ხოლო ინდუსტრიის წარმომადგენლებმა არჩევანი მილა ვან იტენზე შეაჩერეს.

ფოტო: Vogue

"ამომავალი ვარსკვლავის" კატეგორიაში ასახელებენ მოდელებს, რომელთა კარიერა უკანასკნელი რამდენიმე სეზონის განმავლობაში განსაკუთრებით განვითარდა და ფიქრობენ, რომ მათ მნიშვნელოვანი კვალის დატოვება შეუძლიათ მოდის ინდუსტრიაში. სწორედ ერთ-ერთ ასეთ იმედისმომცემ სახედ განიხილება ახალგაზრდა მატილდაც.

მატილდა პირველი ქართველი მოდელია, რომელმაც ვოგის გარეკანზე მოხვედრა მოახერხა, თუმცა ეს მოდის საერთაშორისო ასპარეზზე მატილდას ერთადერთი მიღწევა როდია: ის აქტიურად გამოდის პოპულარული ბრენდების ჩვენებებზეც, მაგალითად, ოქტომბერში პარიზის მოდის კვირეულზე Chanel-ის შოუზე გამოვიდა, ამავე კვირეულის ფარგლებში მატილდამ Rokh-ს ჩვენებაც გახსნა.