დღეს, 1 ივნისს, სანდრო ახმეტელის სახელობის დრამატულ თეატრში SOU 2017-ის რიგით მეთოთხმეტე კონცერტი გაიმართება. ქართველი მაყურებლის წინაშე ცნობილი მუსიკოსი იაკობ კირკეგაარდი წარდგება, რომელიც თავის ცნობილ პროექტს A I O N-ს შეასრულებს. ღონისძიება 22:00-ზე დაიწყება.

იაკობ კირკეგაარდი დანიელი კომპოზიტორი და საუნდ არტისტია, რომელიც ამჟამად ბერლინში მოღვაწეობს. მისი ძირითადი მუსიკალური ნაწარმი ბრიტანულ ლეიბლ Touch-ზეა გამოშვებული. ის არტისტული კოლექტივის — freq_out-ის წევრიცაა, რომლის ფარგლებშიც თანამშრომლობს ისეთ ხელოვანებთან, როგორებიცაა JG Thirlwell, ფილიპ ჯეკი და ლიდია ლანჩი.

ფოტო: Fonik.dk

დანიელი ხელოვანი სხვადასხვა ხმების განზომილებას იკვლევს. მისი მიდგომა ერთდროულად შემოქმედებითი და სამეცნიეროა. ამით აიხსნება მისი დაინტერესება ვულკანური ადგილებით, ყინულით დაფარული არქტიკითა თუ ატომური ელექტროსადგურებით. შესაბამისი შედეგის მისაღებად კირკეგაარდი სხვადასხვა სპეციფიკურ აუდიოჩამწერ მოწყობილობებს იყენებს, როგორიცაა ჰიდროფონები, ელექტრომაგნიტური რეცეპტორები და ა.შ.

რა არის A I O N?

გარე ხმოვანი ჩანაწერებისა და ვიდეო მასალის ლუპებისგან შემდგარი 50-წუთიანი კომპოზიცია ალვინ ლუსიეს რევოლუციური ნამუშევრის, I Am Sitting in A Room-ის შთაგონებითაა შექმნილი. Aion 2005 წლის ოქტომბერში ჩაიწერეს და უკრაინაში, ჩერნობილის ყოფილი ატომური ელექტროსადგურების ტერიტორიაზე, აკრძალული ზონის ოთხ მიტოვებულ სივრცეში წარმოადგინეს. თითოეული სივრცის მრავალშრიან ხმოვან ჩანაწერში მისი რეზონანსული სიხშირეები ვლინდება, რასაც იმავე სივრცის მრავალშრიანი ვიდეო-პროექცია ახლავს თან.

ღონისძიებაზე დასასწრები ბილეთების შესაძენად ეწვიეთ TKT.GE-ს.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება .