კანადელი მედდა, რომელიც ავტოკატასტროფის ადგილზე სასწრაფოს დახმარების ბრიგადასთან ერთად მივიდა, საკუთარ შვილს სიცოცხლის ბოლო წუთებში მკურნალობდა. ავარიისას მიღებული დაზიანებების გამო დედამ საკუთარი შვილი ვერ იცნო და ამის შესახებ მოგვიანებით შეატყობინეს.

ჯეიმ ერიკსონი 15 ნოემბერს ალბერტას გზატკეცილის ყინულოვან მონაკვეთზე მომხდარი ავტოავარიის გამო გამოიძახეს. ადგილზე მას მძიმედ დაშავებული თინეიჯერი გოგო დახვდა, რომლის ჭრილობებიც სასიკვდილო იყო. ერიკსონი ნახევარი საათის განმავლობაში ცდილობდა გოგოს დახმარებას, სანამ დაშავებულს საავადმყოფოში გადაიყვანდნენ, სადაც ის გარდაიცვალა.

სახლში მისულ ერიკსონს პოლიციის თანამშრომლები დახვდნენ, რომლებმაც შეატყობინეს, რომ მისი 17 წლის შვილი ავარიის შედეგად დაიღუპა, რადგან დაზიანებები "სიცოცხლესთან შეუთავსებელი" იყო. დედამ სწორედ მაშინ გააცნობიერა, რომ სიცოცხლის ბოლო წუთებში საკუთარი შვილის დახმარებას თავად ცდილობდა.

ფოტო: AP

"კრიტიკულად დაშავებული პაციენტი, რომლის შესახებაც მოგვმართეს, ჩემი სისხლი და ხორცი იყო. ჩემი ერთადერთი შვილი — მონტანა. მიუხედავად ყველაფრისა, მე მადლობელი ვარ იმ 17 წლისთვის, რომელიც მის გვერდით გავატარე. თუმცა ისევ ძალიან მაინტერესებს, რისი გაკეთება უნდოდა ჩემს პატარა გოგოს ცხოვრებაში ან ვინ გახდებოდა", — დაწერა ერიკსონმა თავის პოსტში.

დედის თქმით, მონტანა წარმატებული მოცურავე იყო, რომელიც იურიდიულ სკოლაში ჩაბარებას გეგმავდა, თუმცა ახლა სხვების დახმარება "ბოლო საჩუქრით" შეძლო. ერიკსონმა განაცხადა, რომ მისი შვილის ორგანოებს იმ ადამიანებს გადაუნერგავენ, რომლებისთვისაც ეს სასიცოცხლოდ მნიშვნელოვანია.

"ჩვენ ბედნიერები ვართ იმით, რომ ჩვენი პატარა გოგო სხვების მეშვეობით იცოცხლებს. ამ ტრაგედიის შემდეგ მან სხვა ადამიანები გადაარჩინა. ვიცით, რომ ეს მას სურდა და ვამაყობთ მისით, თან ძალიან, ძალიან გვენატრება", — ამბობს ერიკსონი.