დღეს, 31 მაისს, SOU 2017-ის მორიგი ღონისძიება გაიმართება. ამჯერად, ქართველი მაყურებლის წინაშე ელექტრონული მუსიკის ერთ-ერთი ყველაზე თვალსაჩინო წარმომადგენელი, ფრანკ ვიგრუ წარსდგება. მასთან ერთად სცენაზე იქნება ანტუან შმიტი, რომელიც ღონისძიებას ვიზუალური წარმოდგენით გაალამაზებს. ღონისძიება შოთა რუსთაველის სახელობის დრამატული თეატრის დიდ სცენაზე ჩატარდება და ის 22:00-ზე დაიწყება.

ფრანკ ვიგრუსთვის მუსიკაში მთავარი ელექტრონული იმპროვიზაციაა. ამ მიზნისთვის მისი ტრანს-დისციპლინური პერფორმანსები მრავალ სახვით ხერხს მოიცავს, ახალი მედიიდან — პერფორმანსის ხელოვნებამდე. მის არაპროგნოზირებად მუსიკალურ ნაერთში თავს იყრის ლირიული საგიტარო პარტიები, ინდუსტრიული ხმის კოლაჟები, თანამედროვე კლასიკა და თეთრი ხმაურის კედელიც კი. ამ ყველაფრის თანმიმდევრული კონტროლი კი მას რეჟისორად და სივრცის მანიპულატორად აქცევს. ვიგრუს მუსიკალური მიდგომა იდეალურად ჩანს მის უახლეს ალბომში Rapport Sur Le Desordre, რომელიც ევგენი ზამიატინის დისტოპიური მოთხრობის, ჩვენისადმი მიძღვნილი ალბომების სერიას ასრულებს.

2012 აუდიო-ვიზუალური პერფორმანსი Tempest ფრანკ ვიგრუს ანალოგურ მოწყობილობებს ანტუან შმიტის ვიზუალურ ალგორითმებთან აწყვილებს და ქაოსის რეალურ სისტემა-სამყაროებს ქმნის, რომელთა დანახვაც მილიონობით ნაწილაკის მოძრაობაში, ხოლო გაგონება — ქარის ხმაურში შეიძლება. ამ ქაოსის შინაგანი ძალების მანიპულაციით, შემსრულებლები ისეთ აუდიო და ვიზუალურ ფორმებს ქმნიან, რომელთა ხილულობა და სტაბილურობა თანდათანობით იკვეთება.

ღონისძიებაზე დასასწრები ბილეთების შესაძენად ეწვიეთ TKT.GE-ს.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება .