SOU 2017-ის ფარგლებში, 30 მაისს, Tbilisi Event Hall ექსპერიმენტული ელექტრონული მუსიკის უახლესი ისტორიისათვის მნიშვნელოვანი ბრიტანული ტალღის ერთ-ერთი ლეგენდარულ ფიგურას, Squarepusher-ის ფსევდონიმით ცნობილს ტომ ჯენკინსონს უმასპინძლებს.

ტომ ჯენკინსონი ქართველი მაყურებლის წინაშე პროექტ Shobaleader One-ით სამ მუსიკოსთან (Strobe Nazard, Squarepusher, Company Laser და Arg Nution) ერთად წარსდგება. ისინი სრულიად ახალ ნამუშევარს, Elektrac წარმოგვიდგენენ.

მუსიკალური სამყაროსთვის Squarepusher-ის სახელით ცნობილი ტომ ჯენკინსონი, ბრიტანელი ელექტრონული მუსიკის პროდიუსერია. იგი თვითნასწავლი ბასისტია, რომელიც კომპოზიციურ სტრუქტურას, აუდიო მასალის ჩაწერას და მიქსინგს თავადვე აკეთებს.

ფოტო: Electronic Beats

მისი პირველი მუსიკალური ჩანაწერები 1994 წელს გამოჩნდა და მუსიკალური თვალსაზრისით, იმდროინდელ ბრიტანულ Drum'N'Bass ტალღას შეესაბამებოდა. დებიუტიდან 20 წლის შემდეგ, მუსიკისადმი მისი ინოვაციური მიდგომა არ შეცვლილა. 2015 წელს რობოტებისგან შემდგარ ბენდთან თანამშრომლობით ალბომი გამოუშვა.

Shobaleader One სხვადასხვა სესიური მუსიკოსებისგან შექმნილი ჯგუფია, რომელიც ჯენკინსონის მუსიკის შესრულებას უკვე ბენდის ფორმატში ცდილობს. 2017 წელს გამოშვებული მათი მეორე ალბომი Elektrac უფრო ფანკი და პროგრესული ჟღერადობით გამოირჩევა, სადაც ყველა წევრის მნიშვნელობა თანაბარია. Elektrac მისტიური ბენდის, Shobaleader One-ის მეორე ალბომია, რომელიც Squarepusher-ის კლასიკად ქცეული 11 კომპოზიციის რეინტერპრეტაციისგან შედგება. ჯგუფის პირველი ალბომი საშუალო ტემპის, R&B ნარევი ფანკ ჩანაწერი იყო, ახალ რელიზში კი მსმენელი სწრაფ ჯაზ-ფანკს, მეტალისა და პროგრესული როკის ნაზავს შეხვდება.

Elektrac ლაივ ჩანაწერია, რომელშიც თავს ჯენკინსონის ადრეული, ბენდის მიერ გაცოცხლებული, ნამუშევრებიც იყრის. კომპოზიციების უმეტესობაში საგულისხმოა დრამის პარტიები და მისი შესრულების ტექნიკური მახასიათებლები. განსაკუთრებულ ყურადღებას იმსახურებს 1990-იანი წლების დრილ-ნ-ბასის ჩანაწერებში არსებული ტემპის ცოცხალი შესრულება. მართალია, ალბომში თითოეულ მუსიკოსი თანაბრად არის წარმოდგენილი, მაგრამ Squarepusher-ის თავისუფალი ბას-სოლოებისთვის ადგილი მაინც რჩება.

ფოტო: Unknow

30 მაისის ღონისძიება არამხოლოდ გენიალური მუსიკით, არამედ ეფექტური ვიზუალური გაფორმებითაც იქნება გალამაზებული. ღონისძიებას Tbilisi Event Hall მასპინძლობს და ის 22:00-ზე დაიწყება.

ბილეთები 25 ლარი ღირს და მისი შეძენა TKT.GE-ზე შეგიძლიათ.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება .