შაბათს, 27 მაისს, მთაწმინდის პარკში კიდევ ერთი ქართული მუსიკალური ფესტივალი EZO გაიხსნება. ორგანიზატორები ფესტივალზე მოსულ ადამიანებს მრავალფეროვნებას, კარგ მუსიკას, გართობასა და დასვენებას ჰპირდებიან.

EZO Festival უკვე მესამე წელია ტარდება და მიუხედავად მისი არსებობის მოკლე ისტორიისა, სახელი უკვე გაითქვა.

მთაწმინდაზე მისულ ადამიანებს ფესტივალის ტერიტორიაზე შესვლა 14:00 საათიდან შეეძლებათ. კარებთან იმოქმედებს Face და Age კონტროლი.

როგორც ორგანიზატორები ამბობენ, 2017 წლის სეზონი სავსე იქნება ექსპერიმენტებით და ფესტივალის აქამდე არსებული ჩარჩოებიც დაირღვევა.

აღსანიშნავია, რომ EZO-ს ფარგლებში ოთხი გრანდიოზული ღონისძიება ჩატარდება. 27 მაისის ღონისძიება ერთ-ერთი მათგანია. მეორე მთავარი ღონისძიება 24 ივნისს იქნება, მესამე - 15 ივლისს და 8-9 ივნისს დაიხურება. ამგვარი ფორმატი ადამიანებს ცხელი ზაფხულის სასიამოვნოდ გაატარების საშუალებას აძლევს.

ფესტივალის გახსნის დღეს სტუმრებს უამრავი გასართობი, სიახლე და გემოვნებიანი მუსიკა ელით. წელს, შარშანდელთან შედარებით, გაზრდილია საფესტივალო ტერიტორია და დიდი შრომის შედეგად, ინფრასტრუქტურაც გაუმჯობესებულია.

წელს EZO-ს 4 დიდი ივენთისთვის მთავარი სიახლე ახალი სცენა - უკანა ეზო იქნება. ფესტივალის მთავარ ღონისძიებებზე, ღამის საათებში, არტისტები უკანა ეზოს სცენებზეც დაუკრავენ.

27 მაისს მთაწმინდაზე მისულ ადამიანებს ფესტივალის ტერიტორიაზე დახვდებათ MZESUMZIRA’s Café, რომელიც ფესტივალის ტერიტორიაზე მთელი სეზონის განმავლობაში ყოველდღე იფუქნციონირებს.

MZESUMZIRA’s Café-ს მნიშვნელობა მხოლოდ კვებით არ შემოიფარგლება. ის უმასპინძლებს გამოფენა-გაყიდვებს, საჭმელ-სასმელის ბაზრობებს, ქართველი ხელოვანებისა და საზოგადო პირების ვორქშოფებსა და საჯარო ლექციებს, კინო ჩვენებებს, არტ პერფორმანსებს, იოგას, ბორდ-გეიმ შეკრებებსა და ა.შ.

ფესტივალის გახსნის დღეს მაყურებლის წინაშე რამდენიმე ნიჭიერი და გამოცდილი მუსიკოსი წარდგება.

Line-up-ი ასეთი იქნება:

> 27 მაისი (სეზონის გახსნა)
► მთავარი სცენა:

  • Radio Grue (14:00 - 18:00)
  • Rati (18:00 - 21:00)
  • Gabunia (21:00 - 00:00)
  • Sebo K (00:00 - 03:00)
  • D'julz (03:00 - 06:00)
  • Jay Shepheard (06:00 - 09:00)

► უკანა ეზო (პატარა სცენა):

  • Vaska ( 09:00 - 12:00)
  • Ako Von Unten (12:00 - დახურვამდე)

შეგახსენებთ, რომ ღონისძიებაზე დასასწრები ბილეთების გაყიდვა უკვე დაწყებულია. ბილეთების შესაძენად ეწვიეთ ამ საიტს. ფესტივალის კარები 14:00-ზე გაიღება და შესასვლელთან იმოქმედებს FACE და AGE კონტროლი. ონლაინ შეძენილი ბილეთების მფლობელებისთვის იქნება სპეციალური შესასვლელი.