გუშინ, ა. ხორავას სახელობის მსახიობთა სახლში SOU 2017-ის მორიგი კონცერტი გაიმართა. ამჯერად, მაყურებლის წინაშე მასაიოში ფუჯიტა და იან იელინეკი წარდგნენ. წარმოდგენა საღამოს, 22:30-ზე დაიწყო და დაახლოებით ერთ საათს გაგრძელდა.

როცა მსახიობთა სახლში ყველა ადგილი შეივსო და შემოსასვლელი კარები დაიკეტა, დარბაზში სიჩუმემ დაისადგურა და სცენაზე დღის მთავარი მოქმედი პირები გამოჩნდნენ. აუდიტორია გასუსული იჯდა, ეს თავიდანვე შესამჩნევი იყო, მაგრამ როგორც კი პირველი ბგერა გაისმა, სიჩუმე უფრო მუსიკალური და ყოვლისმომცველი გახდა.

ფოტო: ანკა გუჯაბიძე

SOU 2017-ის ფარგლებში ჩამოსულმა არტისტებმა, მასაიოში ფუჯიტამ და იან იელინეკმა, თავისი მუსიკით ქართველი მაყურებლები მონუსხეს და ერთი საათის განმავლობაში მუსიკალური მედიტაცია ჩაუტარეს. სცენაზე დამაგრებული იყო უზარმაზარი მონიტორი, რომელზეც მუსიკოსების მოქმედება ლურჯი ნათების ფონზე მოსჩანდა. ამგვარი ვიზუალური აღქმა ისეთ განცდას ქმნიდა, რომლის ფონზეც სხვა ცხოვრებისეული საფიქრალი უბრალოდ უკვალოდ ქრებოდა.

ფოტო: ანკა გუჯაბიძე

წარმოდგენის დასასრულს ა. ხორავას სახელობის მსახიობთა სახლში შეკრებილმა აუდიტორიამ მუსიკოსები ხანგრძლივი აპლოდისმენტებით დააჯილდოვა. ტაში არ წყდებოდა. მუსიკოსებმა იგრძნეს, რომ მათი ინსტალაციით მონუსხული აუდიტორია კონცერტის გაგრძელებას ითხოვდა, რის შემდეგაც მასაიოში ფუჯიტა და იან იელინეკი სცენაზე დაბრუნდნენ და წარმოდგენა კიდევ ოცი წუთით გააგრძელეს.

საბოლოო ჯამში, მუსიკოსები ძალიან კმაყოფილები იყვნენ როგორც ფესტივალით, ისე აუდიტორიითაც.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება .