Disney-მ პატარა ქალთევზას პირველი ტრეილერი გამოუშვა, რომელშიც არიელის როლს მსახიობი და მომღერალი, ჰოლი ბეილი ასრულებს. პატარა ქალთევზას პრემიერა 2023 წლის 26 მაისს იგეგმება, ფილმის პირველი კადრების შესახებ კი ჰოლი ბეილმა კომენტარი უნდა გააკეთა.

"როცა პატარა გოგო ვიყავი და აუზში ვცურავდი, თავს ყოველთვის ქალთევზად წარმოვიდგენდი და ვერასდროს ვიფიქრებდი, რომ ეს რეალობა გახდებოდა. Part of Your World-ს 3 დღე ვიღებდით და ეს ყველაზე საოცარი გამოცდილება იყო ჩემს ცხოვრებაში. მეც განვიცადე ყველა ის ემოცია, რომელსაც ჩემი პერსონაჟი განიცდის", — ამბობს ჰოლი ბეილი.

აღსანიშნავია, რომ Disney-მ პატარა ქალთევზაზე მუშაობა დიდი ხნის წინ დაიწყო. ჰოლიმ როლი 19 წლის ასაკში მიიღო, თუმცა კორონავირუსის გავრცელების ფონზე გადაღებები რამდენჯერმე გადაიდო. ფილმის რეჟისორი რობ მარშალია, სცენარისტი კი დევიდ მეგი. პატარა ქალთევზაში 1989 წლის ორიგინალი ანიმაციის სიმღერები და კომპოზიციები იქნება გამოყენებული.

გარდა იმისა, რომ ჰოლი ბეილს არიელის როლში ვიხილავთ, ფილმში მონაწილე სხვა მსახიობების ვინაობაც ცნობილია. ფილმში არიელის მეგობარი თევზის, ფლაუნდერის როლს ჯეიკობ თრემბლი, ურსულას როლს — მელისა მაკარტი, მეფე ტრიტონის როლს — ხავიერ ბარდემი, პრინცი ერიკის როლს კი ჯონა ჰაუერ-კინგი ასრულებს.