კინოს სამყაროს ერთ-ერთი ყველაზე შემზარავი ბოროტმოქმედი ეკრანებზე ბრუნდება!

13 წლის შემდეგ 21-ე საუკუნის ერთ-ერთი ყველაზე ცნობილი საშინელებათა ჟანრის ფილმის — Orphan (ობოლი) ახალი ნაწილი გადაიღეს და ამ ჟანრის მოყვარულებს კიდევ ერთი დამაინტრიგებელი სანახაობა ელოდება.

მართალია, პირველი ნაწილი ყველაზე მეტად თავისი მოულოდნელი და შოკისმომგვრელი ფინალითაა ცნობილი, თუმცა სულ ახლახან გამოსული ტრეილერით თუ ვიმსჯელებთ, ამჯერადაც მოუწევს მაყურებელს ნერვიულობისგან ფრჩხილების კვნეტა:

ობოლი 2009 წელს გამოვიდა და მაშინვე მოიპოვა დიდი აღიარება. მართალია, ორიგინალი ფილმი ანტიგმირის, ესთერის მკვლელობით დასრულდა, თუმცა არ შეშინდეთ, ახალ ნაწილში ის არ ცოცხლდება: მომავალი ფილმი მისი წინარე ისტორიისა და მისი პირველი მსხვერპლების შესახებ მოგვითხრობს. ამ ახალი ნაწილის სახელწოდებაც ასეთია: Orphan: First Kill (ობოლი: პირველი მკვლელობა).

რაც ყველაზე მთავარია, საკულტო როლს კვლავ იზაბელ ფურმანი ასრულებს, მიუხედავად იმისა, რომ პირველი ფილმის გადაღებისას ის 12 წლის იყო, ახლა კი უკვე ოცდახუთისაა.

ამასთან დაკავშირებით მსახიობმა განაცხადა:

"მომწონს გამოწვევა, რომ ბავშვის როლი უნდა შევასრულო, რადგან ეს ისტორიულად არასდროს მომხდარა: ზრდასრულ ადამიანს არასდროს განუსახიერებია ბავშვი. როცა პირველად ეს როლი მოვირგე, მაშინ ბავშვიც უნდა ვყოფილიყავი და ზრდასრულიც. მაშინ ზრდასრულობის თამაში იყო რთული, ახლა კი პირიქით — ბავშვობა იყო გამოწვევა. თუმცა ეს მაინც შევძელით".

თანაც მსახიობი აღნიშნავს, რომ გადაღებისას კომპიუტერული ეფექტები არ გამოუყენებიათ:

"ჩვენ არ გამოგვიყენებია სპეციალური ეფექტები, არც გრიმის ხრიკები. და ვფიქრობ, თუნდაც ამის გამოცაა ეს ფილმი საინტერესო, რადგან ვერაფრით ამოხსნი, რანაირად ვგავარ 9 წლის ბავშვს, მაგრამ ფაქტია, რომ ვგავარ".

ფილმის პრემიერა 18 აგვისტოსაა დაგგემილი და იმედია, მისი ხილვა საქართველოს კინოთეატრებშიც შეგვეძლება.

ფოტო: Paramount+