თუ ფიქრობ, რომ გერმანულმა არტიკლმა ეგზისტენციალურ კრიზისში ჩაგაგდო, მარტო არ ხარ. მსოფლიოში მილიონობით ადამიანი სწავლობს გერმანულ ენას იმ იმედით, რომ ოდესმე არტიკლების სწორად გამოყენებას, სიტყვების მართლწერასა და "რატომ"-ის ყველა შესატყვისს ისწავლის. მოკლედ, ამ სტატიაში თავი მოვუყარეთ იმ განსაცდელებს, რომელთა წინაშეც გერმანულის შემსწავლელი ყველა ადამიანი აღმოჩენილა.

1. სიტყვები ნიკოფსიიდან დარუბანდამდე

გერმანულს უზარმაზარი სიტყვების მქონე ენის რეპუტაცია აქვს და სავსებით სამართლიანადაც. მაგალითად, სიტყვა Grundstücksverkehrsgenehmigungszuständigkeitsübertragungsverordnung არც მეტი, არც ნაკლები, 67 ასონიშანს მოიცავს. საშუალო სტატისტიკური გერმანული სიტყვა კი, ფაქტობრივად, დედამიწიდან მთვარემდე მანძილს ფარავს.

2. არტიკლები, ანუ ესა-მესა გადის ესა!

მასწავლებელი პირველივე გაკვეთილზე გეუბნება, რომ გერმანულ გრამატიკაში სამად სამი სქესია. მარტივია, არა? მოიცადე, სანამ გაიგებდე, რომ განუსაზღვრელი და განსაზღვრული არტიკლი ოთხ სხვადასხვა ბრუნვაში ფორმას იცვლის, სქესის განსასაზღვრავად კი კონკრეტული წესი არ არსებობს — ასე, უბრალოდ: სიტყვას სწავლობ არტიკლთან ერთად.

3. წინადადების უმკაცრესი სტრუქტურა

ამ შემთხვევაში მკითხაობა ნამდვილად არ ჭრის, რადგან გერმანულში წინადადების "გარტყმით" და სწორად დაწერა შეუძლებელია. წინადადება ამ ენაში მკაცრი სტრუქტურით გამოირჩევა, სადაც ყველა სიტყვას თუ ნაწილაკს თავისი ადგილი აქვს მიჩენილი.

4. თავსართმოცილებადი ზმნებით გამოწვეული თავის ტკივილი

გერმანული ზმნა ცალკე ორგანიზმია, რომელსაც ხვლიკის მსგავსად შეუძლია ნაწილი მოიწყვიტოს და წინადადების ბოლოში გადაისროლოს. ჰო, აი, ასე, მარტივად!

5. უთარგმნელი სიტყვები

გერმანელებს ცალკე სიტყვა აქვთ იმ ფაქტის აღსანიშნავად, როცა საქმეს გაუმჯობესების მცდელობაში გააუარესებ. ასევე კიდევ უამრავი უცნაური ტერმინი, რომლის ქართულად სათარგმნად ლექსიკონში ერთი სტრიქონი არ გეყოფა.

6. რატომ არის გერმანულში ამდენი რატომ?

არსებობს ასეთი ხუმრობა, რომ პირველ დღეს ღმერთმა შექმნა warum, მეორე დღეს — wieso, მესამე დღეს — wozu, მეოთხე დღეს — wofür, მეხუთე დღეს — weshalb, მეექვსე დღეს — weswegen. მეშვიდე დღეს კი იმ ფაქტით კმაყოფილმა დაისვენა, რომ კითხვა "რატომ"-ის აღსანიშნავად 6 სხვადასხვა სიტყვა შექმნა.

7. ინტუიცია ყოველთვის ტყუის

მარჩიელობა რომ გერმანულ წინადადებასთან დიდად არ ჭრის, ეს უკვე ვთქვით. თუმცა, ცალკე უნდა გაგაფრთხილო, რომ არც კი სცადო, ინტუიციურად გამოიცნო სიტყვის მნიშვნელობა, ზმნის ფორმა ან თუნდაც ზედსართავის დაბოლოება. გერმანული ყოველთვის დაგიმტკიცებს, რომ შენზე ჭკვიანია.

8. მართლწერა გამოცდაზე პირველი მტერია

უსაშველოდ დიდი სიტყვის დაწერისას შეცდომა რომ არ გაგეპაროს, ამას დიდი ყურადღება და მოთმინებით გადაკითხვა სჭირდება, მაგრამ არც ის უნდა დაივიწყო, რომ ყოველი არსებითი სახელი დიდი ასოთი იწერება, უმლაუტი კი ბევრ რამეს ცვლის.

9. მასალა არა და არ ილევა!

კიდევ ერთ ხუმრობას თუ დავესესხებით, ცხოვრება მეტისმეტად ხანმოკლეა გერმანულის სასწავლად.

10. დაიცადე, სანამ დიალექტებს გაიცნობ

გეგონა, მხოლოდ ეს იყო? შვეიცარიული გერმანული საერთოდ მოგისმენია?