36 წლის შემდეგ ტომ კრუიზი საკულტო როლით დაბრუნდა!

დიდ ეკრანზე უკვე გამოვიდა 1986 წლის გახმაურებული ფილმის Top Gun ახალი ნაწილი Maverick, რომელიც ყველას მოულოდნელად კინოგაქირავების ლიდერი გახდა: აშშ-ში ფილმის შემოსავლებმა პრემიერიდან სამ დღეში $124 მილიონი შეადგინა, გლობალურად კი ეს მაჩვენებელი $248 მილიონს გაუტოლდა.

ეს კი, როგორც BBC წერს, ტომ კრუზის კარიერაში უპრეცედენტო წარმატებაა, რადგან მისი პირველი ფილმია, რომლის შემოსავლებმაც კინოგაქირავების პირველ კვირაში 100 მილიონ დოლარს გადააჭარბა: იქამდე იმავე საზომით მისი ყველაზე წარმატებული ფილმი War of the Worlds იყო 2005 წელს $64-მილიონიანი შემოსავლით.

ეს ასევე კინოგაქირავების ერთ-ერთი საუკეთესო შედეგია მას შემდეგ, რაც პანდემია დაიწყო: ტოპ განს მხოლოდ ისეთი ფილმები უსწრებენ, როგორებიცაა Spider-Man: No Way Home, Doctor Strange in the Multiverse of Madness და The Batman.

ქეით მიდლტონი და ტომ კრუზი ლონდონში Top Gun: Maverick-ის პრემიერაზე.

ფოტო: Getty Images

თუმცა, თუ ცოტა ყურადღებით გადავხედავთ ფილმის მარკეტინგულ კამპანიას, ეს შედეგები არც ისე მოულოდნელი იქნება: ლონდონში პრემიერას სამეფო ოჯახის წევრებიც კი დაესწრნენ.

ფილმიდან კადრები მსოფლიოში ყველაზე მაღალ შენობაზე, ბურჯ-ხალიფაზეც გაუშვეს:

ფილმისთვის საუნდტრეკი კი ისეთმა სახელოვანმა მომღერალმა ჩაწერა, როგორიც ლედი გაგაა:

ფინანსურ წარმატებასთან ერთად ფილმმა დადებითი შეფასებები დაიმსახურა კრიტიკოსებისგანაც: უმრავლესობა იმასაც კი ამბობს, რომ გაგრძელება ორიგინალ ფილმს სჯობია, რაც საკმაოდ იშვიათი შემთხვევაა კინოინდუსტრიაში.

Top Gun: Maverick უკვე გადის საქართველოს კინოთეატრებშიც და მისი შეფასება ქართველ მაყურებელსაც შეუძლია დიდ ეკრანზე.