13 წლიანი ლოდინის შემდეგ ავატარის მეორე ნაწილის პირველი ტრეილერი აქაა! Avatar: The Way of Water-ის პრემიერა დეკემბერშია დაგეგმილი და გულშემატკივრებს კვლავ თვალისმომჭრელ სანახაობას ჰპირდება.

The Way of Water-ის რეჟისორი, რა თქმა უნდა, კვლავ ჯეიმს კამერონია. ახალ ფილმში ძველი ვარსკვლავები — სემ უორტინგტონი, ზოი სალდანა და სიგურნი უაივერი ბრუნდებიან. ახალ მსახიობებს შორის კი აღსანიშნავია ქეით უინსლეტი, რომელიც კამერონთან ერთად ტიტანიკის შემდეგ პირველად მუშაობს.

ფილმში მოვლენები უმეტესად ოკეანეში განვითარდება და ფილმის შემქმნელების მიხედვით, ამ ყველაფრის დასაფიქსირებლად ახალი ტექნოლოგიაც კი შეიმუშავეს.

ავატარი 2009 წელს გამოვიდა და პრემიერისთანავე წლის კინომოვლენად აღიარეს. ის აქტუალურობას დღემდე არ კარგავს, რადგან $2,8 მილიარდით ყველა დროის ყველაზე მაღალშემოსავლიანი ფილმია.

რა თქმა უნდა, მეორე ნაწილის ბიუჯეტიც დიდია, თუმცა კინოსამყარო კოვიდის შემდეგ შეიცვალა. ამის გამო ჯეიმს კამერონი ღელავს, რომ შესაძლოა, მეორე ნაწილი მომგებიანი არ აღმოჩნდეს და წინამორბედის წარმატება ვერ გაიზიაროს:

"მთავარი პრობლემა შემდეგია: მივიღებთ შემოსავალს? მასშტაბურმა, მაღალბიუჯეტიანმა ფილმებმა დიდძალი შემოსავალიც უნდა მიიღოს. ახლა პოსტკოვიდურ, პოსტსტრიმინგ ეპოქაში ვართ. ვინ იცის? ეს ყველაფერი კამათლის გაგორებას ჰგავს", — ამბობს ჯეიმს კამერონი.