ქართველი მწერალი, ივა ფეზუაშვილი, ევროკავშირის ლიტერატურული პრემიის გამარჯვებული გახდა. ავტორმა პრიზი რომანისთვის ბუნკერი მიიღო, შვიდი წევრისგან შემდგარი ჟიურის გადაწყვეტილების შესახებ კი სულ ცოტა ხნის წინ გახდა ცნობილი.

ფეზუაშვილის გარდა, ჟიურიმ 5 საპატიო ჯილდოც გადასცა ბელგიელ, ბოსნიელ, ირლანდიელ, ესპანელ და უკრაინელ ავტორებს.

აღსანიშნავია, რომ სხვა წლებისგან განსხვავებით, ამჯერად მხოლოდ ერთი გამარჯვებული დასახელდა, ნაცვლად ყოველი მონაწილე ქვეყნიდან ლაურეატის გამოვლენისა. მანამდე, 2019 წელს, ამავე პრემიის მფლობელი კიდევ ერთი ახალგაზრდა ქართველი ავტორი, ბექა ადამაშვილი, გახდა წიგნისთვის ამ რომანში ყველა კვდება.

2022 წელს ევროკავშირის ლიტერატურულ პრემიაზე 14 ქვეყნის 14 ავტორი იყო წარდგენილი. ღონისძიების დასკვნითი ნაწილი პარიზის წიგნის ბაზრობაზე გაიმართა, გამარჯვებულის ვინაობა კი წიგნის საერთაშორისო დღემდე ცოტა ხნით ადრე გახდა ცნობილი.

რაც შეეხება ივა ფეზუაშვილს, 31 წლის ავტორისთვის ეს პირველი წარმატება არ ყოფილა. რიგით მეორე რომანისთვის ბუნკერი მწერალმა ჯერ წინანდლის პრემია დაიმსახურა, გასულ წელს კი საბაც მიიღო სპეციალურ ნომინაციაში — საბჭოთა და პოსტსაბჭოთა ისტორიის რეფლექსია ქართულ ლიტერატურაში.

ბუნკერმა, რა თქმა უნდა, მაშინვე მიიქცია ევროპელი მკითხველის ყურადღება, როცა წიგნი პრესტიჟული ევროპული პრემიის ნომინანტად დასახელდა, თუმცა, ეჭვგარეშეა, რომ გამარჯვება რომანისა და ავტორის პოპულარობას კიდევ უფრო გაზრდის.