მარველი დიდ ძალისხმევას ხარჯავს იმაზე, რომ შურისმაძიებლების ყოველი ფილმის სიუჟეტი პრემიერამდე მკაცრად იყოს გასაიდუმლოებული. Avengers: Infinity War-ის შემთხვევაში ეს გეგმა იდეალურად შესრულდა, თუმცა ფრენჩაიზის ბოლო ფილმის გამოსვლამდე გამკაცრებულმა ზომებმა ვერ იმუშავა და რამდენიმე დღის წინ ინტერნეტში ფილმის ნაწყვეტი გავრცელდა, რომელიც მნიშვნელოვან სპოილერებს შეიცავს.

ამის გამო მარველმა გადაწყვიტა, რუსეთსა და რამდენიმე ქვეყანაში ფილმის ინგლისური ჩვენება აეკრძალა. მანამდე იგეგმებოდა, რომ ფილმის პრემიერა 29 აპრილს ინგლისურად, რუსული სუბტიტრებით შედგებოდა. სიფრთხილის მიზეზი სავარაუდოდ კინოთეატრების თანამშრომლები არიან, რომელთაც შეიძლება ფილმიდან ნაწყვეტები ონლაინ გაავრცელონ.

აკრძალვა დსთ-ს ქვეყნებს ეხება, რომელშიც 9 ყოფილი საბჭოთა რესპუბლიკაა გაერთიანებული: აზერბაიჯანი, ბელარუსი, თურქმენეთი, მოლდოვა, სომხეთი, რუსეთი, ტაჯიკეთი, უზბეკეთი, ყაზახეთი და ყირგიზეთი.

რაც შეეხება საქართველოს კინოთეატრებს, ფილმის პრემიერის თარიღი ჯერჯერობით უცნობია, თუმცა ცნობილია ის, რომ ფილმი სტანდარტულად, ყველა ენაზე გავა.

აშშ-ში ფილმის პრემიერა 26 აპრილს შედგება.