2005 წლის შემდეგ ფლორიდელი ფერმერები ომში არიან ჩაბმულები - ისინი აზიურ რწყილს ებრძვიან, რომელიც ფორთოხლის მოსავალს ანახევრებს. მწერთან გამკლავება ფერმებს ძალიან უჭირთ, რადგან პესტიციდები და სხვადასხვა ტიპის საწამლავი მათ წინააღმდეგ უძლურია.

პრობლემის გადაწყვეტა ფუტურისტული მეთოდით იგეგმება. მწერების დახოცვას Intellectual Ventures-ის შექმნილი ლაზერული ღობით გეგმავენ. Intellectual Ventures ტექნოლოგიური კომპანიაა, რომელიც Microsoft-ის ყოფილმა მთავარმა ტექნოლოგმა, ნათან მირვოლდმა დააარსა. მოწყობილობა, რომელიც კამერისა და ლაზერული სხივისგან შედგება, ფლორიდაში ამ ზაფხულს დამონტაჟდება. მის ეფექტიანობას კომპანია აშშ-ს სოფლის მეურნეობის დეპარტამენტთან ერთად დააკვირდება.

მოწყობილობა თავიდან აფრიკის მოსახლეობის მალარიის გადამტანი კოღოებისგან დაცვის მიზნით შეიქმნა, თუმცა კომპანია იძულებული გახდა, პროექტისთვის კომერციული მიზნები დაესახა.

"თავდაპირველი მიზანი, ცხადია, არ დაგვვიწყებია, მაგრამ ამისთვის საჭიროა ფინანსები და უფრო დახვეწილი ტექნოლოგია,"- ამბობს ნათან მირვოლდი.

Intellectual Ventures ამჟამად მოწყობილობის რიგით მესამე პროტოტიპზე მუშაობს. ლაზერულ ღობეს სინამდვილეში ფოტონის ღობე ჰქვია. ამ უხილავი მესერის ზომა ჰორიზონტალურად 30 მეტრია, ხოლო ვერტიკალურად - 3.

პირველადი ტესტების დროს ლაზერმა კოღოები, ბუზები და აზიური ციტრუსის რწყილები დახოცა.

ამ გიფზე ჩანს, როგორ კლავს ლაზერი აზიურ ციტრუსის რწყილს.

ფოტო: Intellectual Ventures

მომავალ წელს კომპანია უფრო დიდი, 100-მეტრიანი არეალის მქონე ლაზერული ღობის გამოშვებას გეგმავს. მათი თქმით, მოწყობილობა ძვირი ღირს, მაგრამ მას გლობალური პრობლემების მოგვარება შეუძლია. Intellectual Ventures-ში აცხადებენ, რომ ფოტონის ღობით პეპსი და კოკა-კოლა დაინტერესდნენ - ამ კომპანიებს ციტრუსის უდიდესი პლანტაციები აქვთ და მწერების პრობლემა მათთვისაც აქტუალურია.