ეს კვირა კოკა-კოლასთვის კარგად არ დაწყებულა. მსოფლიოს ყველაზე პოპულარულმა ფეხბურთელმა, კრიშტიანუ რონალდუმ გამაგრილებელი სასმელის ბოთლი პრესკონფერენციაზე, მედიის თვალწინ გვერდით გადადო და წყლის ბოთლი დაიდო წინ. იმის მიუხედავად, რომ აღნიშნულ წყლის ბრენდსაც კოკა-კოლა ფლობს, კომპანიამ რამდენიმე მილიარდით იზარალა.

რონალდუს ტრენდი სხვა ფეხბურთელებმაც გააგრძელეს: მსგავსი რამ გაიმეორა კიდევ ერთმა ფეხბურთელმა, მანუელ ლოკატელიმაც. 23 წლის იტალიელმა ნახევარმცველმა ევროპის ჩემპიონატის ფარგლებში გამართულ ერთ-ერთ კონფერენციაზე კოკა-კოლას ბოთლები გვერდით გადადო და წინ წყალი დაიდგა.

სასმელების კამერების ხედიდან გადაადგილების ტრენდი აიტაცა პოლ პოგბამაც და ჰეინეკენის მწვანე ბოთლი გვერდით გადადო, თუმცა მას სხვა მიზეზი ჰქონდა: ფრანგი ფეხბურთელი მუსლიმია და სარწმუნოებიდან გამომდინარე, ალკოჰოლს არ სვამს. თუმცა აღსანიშნავია, რომ ჰეინეკენი 0% ალკოჰოლს შეიცავს.

კოკა-კოლაც და ჰეინეკენის UEFA-ს ჩემპიონატის ერთ-ერთი უდიდესი სპონსორები არიან და ახლა, ევროპული ფეხბურთის ასოციაციების კავშირი ჩემპიონატში მონაწილე 24 გუნდის მოთამაშეებს სთხოვს, რომ შეწყვიტონ სტრატეგიულად განთავსებული სპონსორი სასმელების გადაადგილება პრესკონფერენციების დროს.

"ეს მნიშვნელოვანი საკითხია, რადგან შემოსავალი, რომელსაც სპონსორებისგან გვაქვს, ევროპის ჩემპიონატის გასამართად აუცილებელია", — აცხადებს ევრო-2020-ის დირექტორი მარტინ კალენი და მოთამაშეებს სპონსორების პატივისცემისკენ მოუწოდებს. ამასთან ერთად, ის დასძენს, რომ მუსლიმი ფეხბურთელების კონფერენციაზე მისვლამდე მაგიდიდან ლუდის ბოთლები აიღონ.

კოკა-კოლა და ჰეინეკენი EURO 2020-ს 12 ტოპ-სპონსორში არიან. ჩემპიონატი ამ 12 სპონსორისგან ჯამში 2,4 მილიარდ დოლარს იღებს.

ასევე იხილეთ: