მას შემდეგ, რაც ცნობილმა ფეხბურთელმა, კრიშტიანუ რონალდუმ Euro 2020-ის პრესკონფერენციაზე მაგიდიდან დემონსტრაციულად გადადგა კოკა-კოლას ორი ბოთლი, მათ ნაცვლად კი წყალი დაიდგა, საკვები ინდუსტრიის გიგანტმა $4 მილიარდით იზარალა.

სანამ რონალდუს ამ საქციელს სოციალურ ქსელებში აქტიურად განიხილავენ, ინტერნეტში 2006 წლის მსოფლიო თასის პერიოდში მიმდინარე კოკა-კოლას სარეკლამო კამპანიის ჩინურენოვანი ვიდეორგოლი და ფოტოები.

სარეკლამო ვიდეორგოლში რონალდუ კოკა-კოლას ქილებზეა გამოსახული, შემდეგ კი ის მაცივარში ყინულის კუბით იწყებს ფეხბურთის თამაშს. ვიდეოს ბოლოს კოკა-კოლას ლოგო და მსოფლიო თასის სიმბოლო ჩნდება.

გარდა ვიდეორგოლისა, რონალდუმ კოკა-კოლას ქილებთან ერთად საიმიჯო ფოტოებზეც იპოზიორა. სურათები ტვიტერზე ავსტრალიელმა იუთუბერმა, ჯეიკ ბეკლიმ, გამოაქვეყნა და იუვენტუსის ფეხბურთელს ფარისევლობაში დასდო ბრალი.

"ანუ კრიშტიანუ რონალდუს კოკა-კოლა არ მოსწონს, არა?", — წერს ბეკლი, — "რა უხერხულია... ალბათ აღარ უხდიან".

თუმცა, ეს ყველაფერი არაა. ზოგმა რონალდუ ხალხისთვის გაზიან სასმელებზე გულის აცრუებისა და ჯანსაღი კვების წახალისების გამო შეაქო, თუმცა, ინტერნეტმომხმარებლებს არც კიდევ ერთი რეკლამის მოძებნა გასჭირვებიათ — ფეხბურთელი ამჯერად სწრაფი კვების რესტორნების გლობალური ქსელის, KFC-ის რეკლამაში "გამოიჭირეს".

2013 წელს გადაღებულ სარეკლამო ვიდეოში ფეხბურთის პორტუგალიელი ვარსკვლავი გოლის გატანას ქათმის ნაგეტებით ზეიმობს.

აღსანიშნავია, რომ რონალდუ ერთადერთი არაა, ვინც Euro 2020-ის ოფიციალური სპონსორის პროდუქცია გვერდზე გადადო. მსგავსად მოიქცა იტალიელი ნახევარმცველი მანუელ ლოკატელიც. ორივე შემთხვევას ინტერნეტსივრცეში არაერთგვაროვანი გამოხმაურება მოჰყვა. ამბავს გამოეხმაურა ქართველი ბიზნესმენი და კოკა-კოლას ფრენჩაიზის მფლობელი თემურ ჭყონია, რომელმაც რონალდუს საქციელს "ხეპრე ფეხბურთელის ჟესტი" უწოდა.