ქართველი ილუსტრატორების წახალისების მიზნით, თბილისის ილუსტრაციის ფესტივალი გაიმართება. მასში მონაწილეობა ქართველ ხელოვანებს შეეძლებათ.

ფესტივალი იუნესკოს პროექტის, თბილისი — წიგნის მსოფლიო დედაქალაქი, ფარგლებში იმართება.

მონაწილეების რაოდენობა შეზღუდულია, ხოლო ნამუშევრებს სპეციალური კომისია ირჩევს. მონაწილეობის მსურველებმა ნამუშევრები 4 ივნისამდე უნდა წარადგინონ.

შერჩეული ილუსტრაციები გამოიფინება თბილისში, 11-12 სექტემბერს, თანამედროვე ხელოვნების მულტიფუნქციურ სივრცეში, მაუდი. ასევე, დაიბეჭდება ბაზრობა-ფესტივალისთვის მომზადებულ ილუსტრაციების კრებულში.

მონაწილეობა შეუძლიათ სხვადასხვა მედიაში მომუშავე ადგილობრივ ილუსტრატორებს, რომლებსაც სურთ გამოფინონ და გაყიდონ საკუთარი ნამუშევრები.

მონაწილეობის კრიტერიუმები:

  • ილუსტრაცია უნდა გადმოსცემდეს ამბავს და იყოს თხრობითი;
  • ილუსტრაცია გასაგებად უნდა აჩვენებდეს პერსონაჟ(ებ)ის ემოციას და ხასიათს.

თბილისის ილუსტრაციების ფესტივალზე გამომცემლებს, ილუსტრატორებს, წიგნისა და კითხვის მოყვარულებს საშუალება ექნებათ გაეცნონ თანამედროვე ქართველი ილუსტრატორების ახალ ნამუშევრებს, ამავე დროს შეიძინონ ლიმიტირებული თუ ხელმოწერილი გამოცემები, პრინტები, ორიგინალები და ილუსტრირებული სუვენირები.

🔉 🔊 იუნესკოს პროექტის, „თბილისი - წიგნის მსოფლიო დედაქალაქი“, ფარგლებში იწყება განაცხადების მიღება თბილისის ...

Posted by თბილისის ილუსტრაციის ფესტივალი/Tbilisi Illustration Fair on Tuesday, May 11, 2021

ილუსტრატორებმა, რომლებსაც საკუთარი ნამუშევრების პოპულარიზაცია და ფესტივალში ჩართვა სურთ, შესაბამისი ინფორმაცია ელექტრონულ ფოსტაზე [email protected] უნდა გაგზავნონ. ორგანიზატორები შემდეგ ინფორმაციას ითხოვენ:

  • სახელი, გვარი, საკონტაქტო ტელეფონი, ვებ-გვერდი/ფეისბუქ-გვერდი/ინსტაგრამ-გვერდი;
  • მინიმუმ 5 (ხუთი) ილუსტრაცია, სათაურები, ზომები, მასალა;

  • ფაილის მინიმალური რეზოლუცია: 300 dpi;

  • ფაილის ტიპი: tiff;

  • ნამუშევრებისა და შემოქმედებითი პრაქტიკის მცირე აღწერა (არაუმეტეს 100 სიტყვისა);
  • ილუსტრაციების ბაზრობა-ფესტივალზე მონაწილეობის გეგმა (არაუმეტეს 100 სიტყვისა);
  • ვებსივრცეში ატვირთული ფაილების ჩამოსაწერი ბმული (WeTransfer, Google Drive და ა.შ.)

ორგანიზატორების ინფორმაციით, ილუსტრაციების ფესტივალზე თითოეულ მხატვარს დაეთმობა კედლის, თაროებისა და მაგიდისგან შემდგარი კუთხე, რომლის ორგანიზების შესაძლებლობაც მხატვარს თავად ექნება.

სტენდზე შეიძლება გამოიფინოს ორიგინალები, ხელნაკეთი ან ბეჭდური წიგნები, მხატვრის სამახსოვრო წიგნი, პორტფოლიო, სავიზიტო ბარათები, ხელმოწერილი გამოცემები, ილუსტრირებული სუვენირები თუ სხვა მასალები.

სტენდზე წარმოსადგენი ყველა ტიპის მასალა (ნაბეჭდი ასლების ჩათვლით) ორგანიზატორებს თავად ილუსტრატორმა უნდა წარუდგინოს.

ღონისძიების ფარგლებში ასევე ჩატარდება საგანმანათლებლო ლექციები ქართველი და უცხოელი ხელოვანების მონაწილეობით.