ასტრონომთა საერთაშორისო გუნდმა, რომელსაც ასტროფიზიკოსი ბრეტ ადისონი ხელმძღვანელობს, აღმოაჩინა ახალი პლანეტა სახელწოდებით TOI-1431b. ახლად აღმოჩენილი პლანეტა სტუმართმოყვარეობით ნამდვილად არ გამოირჩევა. პლანეტაზე არა მარტო ადამიანისთვის, არამედ ყველაფრისთვის ძალიან მაღალი ტემპერტურაა.

TOI-1431b საკმაოდ დიდია, ის იუპიტერზე სამჯერ უფრო მასიურია და ჩვენგან 490 სინათლის წელიწადითაა დაშორებული. პლანეტა თავის ვარსკვლავთან იმდენად ახლოს არის, რომ მის გარშემო ერთ მთლიან ბრუნს სულ რაღაც ორ-სამ დღეს ანდომებს.

რამდენად ცხელი?

ახლად აღმოჩენილ პლანეტაზე ტემპერატურა იმდენად მაღალია, რომ ნებისმიერ მეტალს წამებში ააორთქლებს. მეტიც, პლანეტა ზოგიერთ წითელ ჯუჯა ვარსკვლავზეც ცხელია.

მსგავსი ცხელი პლანეტები ძალიან იშვიათია. ასტრონომებმა TOI-1431b როგორც "ჯოჯოხეთური პლანეტა" ისე აღწერეს.

"პლანეტა გავარვარებულ ლავაზე ცხელია. მეტიც, დღის ტემპერატურით პლანეტა ჩვენი გალაქტიკის ვარსკვლავების 40%-ზე უფრო ცხელია." — ამბობს ბრეტ ადისონი.

ასეთი მონაცემების პლანეტა ნამდვილად არასტუმართმოყვარეა, მაგრამ მეცნიერებისთვის შესასწავლად ის ძალიან საინტერესოა.